भांगरभूंय | प्रतिनिधी
पणजीः प्रधानमंत्री कुशळटाय विकास येवजण आनी कारागीर प्रशिक्षण येवजणे खाला राज्यांतल्या १,७५४ बायलांनी प्रशिक्षण घेतलां. तातुंतलीं ७९ टक्के बायलां कारागीर प्रशिक्षण येवजणे खाला प्रशिक्षीत जाल्यांत, अशी म्हायती कुशळटाय उदरगत आनी उद्देजकता मंत्रालयान दिल्या.
मंत्रालयाच्या बायलां उद्देजकांक तेंको ह्या अहवालांत ही म्हायती दिल्या. ह्या अहवालांत जारी केल्ले आकडेवारी प्रमाण प्रधानमंत्री कुशळटाय विकास येवजणे खाला फाटल्या दोन वसार्र्ंनी ३६३ लावार्थी आसात जाल्यार कारागिर प्रशिक्षण येवजणे खाला १३९१ बायलांनी प्रशिक्षण घेतलां.
कुशळाटाय उदरगत आनी उद्देजकताय मंत्रालय प्रधानमंत्री कौशल्य विकास येवजण राबोवन तांंचे कांय-काळ प्रशिक्षण दिवन तांकां कुशळटाय उदरगतीचे धडे दिल्यात. तशेंच अप-स्किलिंग आनी रि-स्किलिंग वरवीं तरणाटे, बायलां सबंधीत उद्देग मळार रोजगाराची संद वाडोवपा खातीर काम करता.
हे येवजणे खाला वर्स २०२३-२४त १४८ बायलांक प्रशिक्षण दिवन २२ बायलां प्रमाणीत जाल्ल्यो जाल्यार वर्स २०२४-२५त २१५ बायलांक प्रशिक्षण दिवन २६३ बायला प्रमाणीत जाल्ल्यो.
मजगतीं मंत्रालयाचें प्रशिक्षण महासंचलाक कारागीर प्रशिक्षण येवजण चालीक लावन उद्देगीक प्रशिक्षण संस्था (आयटीआय) वरवी तरणाटे बायलांक कुशळ करता. राष्ट्रीय कुशळटाय पात्रतया आराखडो (एनएसक्युएफ) मान्यताय मेळिल्ल्या १६९ वेवसायांनी कारागीर प्रशिक्षण दिता. दरेकी वेवसायाक संमर्पीत अभ्यासक्रम आसता. ह्या प्रशिक्षणाचो काळ स म्हयने, एक वर्स वा दोन वर्साचो आसता. वेवसायांत सामान्य कुशळटाय आनी गिन्यान दिवन प्रशिणार्थीक रोजगार मेळपा खातीर तांकां कुशळ कामगार तयार करपा खातीर हो अभ्यासक्रम तयार केला.
हे येवजणे खाला वर्स २०२२त ४७८ चलयांनी प्रशिक्षण घेतलां, २०२३त ४८३ चलयांनी आनी २०२४त ४३० चलयांनी प्रशिक्षण घेतलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
