युनिटी मॉल रद्द जाय मेरेन उपोशण चालूच दवरपाचो निश्चेव: बसकेंत थाराव संमत
भांगरभूंय | प्रतिनिधी
आंदोलनाक काँग्रेस, आरजी सयत पर्यावरणवाद्यांचो तेंको
पणजी : चिंबला जावपी युनिटी मॉल आनी प्रशासन स्तंभ प्रकल्प जो मेरेन रद्द जायना, तो मेरेन उपोशण सुरूच दवरपाचो निश्चेव करीत थाराव संमत जालो. प्रकल्पा आड जीटीडीसी, टीसीपी अश्या संबंदीत खात्यांनी धडक दिवन निवेदनां दिवपाचो थाराव संमत जालो. विरोधी काँग्रेस, आरजी सयत रमेश गांवस, शंकर पोळजी अश्या सामाजीक वावुरप्यांनी युनिटी मॉला आड चिंबलाच्या ग्रामस्थांक तेंको दिलो.
आमकां नाका, आमकां नाका, युनिटी मॉल आमकां नाका अशी घोशणाबाजी करीत युनिटी मॉलाक विरोध केलो. चिंबला तोयार तळ्याच्या वाठारांत युनीटी मॉल प्रकल्पाचें काम सुरू जालां. हाचे आड २८ डिसेंबर सावन चिंबल ग्रामस्थांचें उपोशण सुरू आसा. आयज आयतारा सकाळीं उपोशण सुरू आशिल्ल्या थळाचेर बसका जाली. हे बसकेक काँग्रेस विधीमंडळ फुडारी युरी आलेमाव, अॅड. कार्लुस फेरेरा, आमदार विरेश बोरकार, अॅड. अमीत पालेकार, रमेश गावस, शंकर पोळजी, अल्बेर्टिना आल्मेदा तशेंच हेर वावुरपी हाजीर आशिल्ले.
सभेक संमत जाल्ले थाराव :
- युनिटी मॉल आनी प्रशासन स्तंभ प्रकल्प रद्द जाय मेरेन २८ डिसेंबर सावन सुरू जाल्लें आंदोलन चालूच उरतलें. आतां खात्यांनी वचून निवेदनां भेटयतले.
- चिंबल ग्रामस्थ ह्यान फुडें हेर थळांचेर जावपी थळाव्यांच्या आंदोलनाक लेगीत तेंको दितले.
पयशे खाल्ल्यान पोटां मोटी जाल्यांत: युरी
ह्या सरकारान भ्रश्टाचार वाडला. पयशे खाल्ल्यान सरकारांत आशिल्ल्या लोकांचीं पोटां मोटीं जाल्यांत. हांव, विरेश आनी कार्लुस पयशे खायनात. हाका लागून आमी स्लीम (बारीक पोट) आसात, अशें युरी आलेमाव हांणी भाशणांत म्हणलें.
भाजप सरकार दिल्लीच्या वर्मा, शर्माच्या खुशालकाये खातीर पर्यावरण, दायज, संस्कृती, परंपरा नश्ट करपी पाड पडिल्ले प्रकल्प (पीपीपी) गोंयांत हाडपाक सोदता. सरकारान म्हादय कर्नाटकाक विकल्या. आता दोंगर, न्हंयो, जमिनी सयत गोंय विकप सुरू जालां. चिंबलच्या तोयार तळ्याचें उदक पयलीं पणजेंत लेगीत वापरतालें. तोयार तळ्या सयत पर्यावरण तशेंच चिंबल राखपाक कॉंग्रेसीचो तेंको आसतलो, अशें आलेमाव हांणी सांगलें.
लोकांचो विरोध आसा, ताका म्हजोय विरोध : विरेश
युनिटी मॉल, प्रशासन स्तंभाक विधानसभेंत लेगीत हांवें विरोध केल्लो. सगल्या प्रकल्पांक तूं विरोध करता, असो आरोप मंत्री रोहन खंवटे हांणी तेन्ना म्हजेर केल्लो. पर्यावरणाक घातकी थारपी आनी लोकांचो विरोध आशिल्ल्या प्रकल्पांक म्हजोय विरोध आसतलोच, अशें आमदार विरेश बोरकार हांणी म्हणले. नावशी मरीना प्रकल्पाक लेगीत हांवें विरोध केल्लो अशें तांणी म्हणलें.
ह्या वेळार अमीत पालेकार, रमेश गांवस, शंकर पोळजी आनी हेरांचीं भाशणां जालीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
