भांगरभूंय | प्रतिनिधी
सेल डीड आसा, कायदेशीर गजाली पुराय करतना ट्रस्टाचीय स्थापना
पणजी : धुळापेर- खोर्लेच्या श्रीसांतेरी रवळनाथ देवळाच्या हक्का विशीं गरज नासतना वाद चालू आसा. थळाव्यांच्या एका गटान उच्च न्यायालयांत देवूळ उडोवपाची याचिका घातल्या. आमी ताका सर्वोच्च न्यायालयांत आव्हान दिले उपरांत थंयूय ते पावले. देवळाचो मान आमकांच आसा. २०२२ त समितीची नेमणूक केल्ली. त्या दिसा सावन हो गट देवूळ बेकायदेशीर म्हणून फाटीक लागला. आमचे कडेन एक चौदा उतारा, पार्टिशन प्लॅन आशिल्लो, फकत आमचे कडेन मालकी हक्काचीं कागदपत्रां नाशिल्लीं, उपरांत आमी भाटकारा कडल्यान सेल डीड मेळयली, टीसीपी कडल्यान परवानगी घेतली आनी सर्वोच्च न्यायालयांत ती दाखयली. त्याच काळांत देवूळ उडोवपाचो आदेश आयलो. देवस्थानाच्यो कायदेशीर गजाली पुराय करतना आमी ट्रस्टूय स्थापन केला, अशी म्हायती श्रीपाद धुळापकार हांणी पत्रकार परिशदेंत दिली.
देवळाच्या मालकी हक्का खातीर लढो दिवपी ग्रामस्थांनी पत्रकार परिशदेत तांची बाजू मांडली. शुक्रारा थळाव्यांच्या एका गटान मामलेदार कार्यालयांत वचून प्रकरण न्यायालयांत प्रलंबीत असूनय तांणी चावी कशी दिली, असो जाब विचारिल्लो. उपरांत प्रतिक्रिया देतना थंयच्या ग्रामस्थांनी पत्रकार परिशदेचें आयोजन केल्लें.
ट्रस्ट स्थापन केल्लें आसतना मामलेदारांनी वेंचणूक घेवपाक फुडाकार घेतिल्लो, हे वेंचणुकेकूय उच्च न्यायालयांतल्यान स्थगिती मेळ्ळ्या, अशी म्हायती धुळापकार हांणी दिली.
भटजी देवस्थानांतल्या कार्याक सहकार्य करिनात. ते भटजी ह्या देवळांत देडशें वर्सां पसून आशिल्ल्याचो दावो करतात. खरें म्हळ्यार ते ४० वर्सां पसून आसात. तांची नेमणूक करपा विशीं आमीच थाराव घेतिल्लो, अशी म्हायती ग्रामस्थांनी घेतली.
२०२२ सावन आमी नेमिल्ल्या भटजींनी वेवस्थीत पुजा केल्या. दुसरो गट आमच्या घरांत देव हाडिनांत असो दावो करतात. मात हें सत न्हय म्हणून काशिनाथ धुळापकार हांणी पुरावो म्हणून फोटो दाखयलो. ह्या गटान देवळांतल्यो धालोय बंद केल्यो अशें तांणी सांगलें.
हो गट देवूळ मोडून घालात म्हणून फाटीक लागला. जर हे लोक हिंदू, जाल्यार ते देवूळ मोडात कित्याक म्हणटात? असो प्रस्न प्रथा नायक हांणी केलो. हो गट आमी काळो जादू करतात म्हणून आमचेर आरोप करता. आमी कायद्या प्रमाण सिसीटीव्ही कॅमेरे बसयिल्ले. ते मोडून घाल्यात. आमी सिसीटीव्ही कॅमेरे बसोवपाचो यत्न करतात, मात ते विरोध करतात. सीसीटीव्ही बसयल्यार आमी कितें करतात हें स्पश्ट जातलें. आमी त्या गटांतल्या भुरग्यांक मारतात असो आरोप जाता. मात देवळा खातीर आमच्या लोकांनी कोणाचेरूय हात उखल्ला, जाल्यार ताचो पुरावो दिवचो अशें आव्हान प्रथा नायक हांणी दिलें.
आमी ट्रस्ट स्थापन केला. तेन्ना देवाच्यो सगल्यो वस्ती, हेर सामान सुरक्षीत आसा अशी म्हायती तांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
