भांगरभूंय | प्रतिनिधी
मडगांव: गोंयांत पोशिल्ल्या जनावरांच्या कानाक ईयर टॅग बसोवप कायद्यान स्कतीचें केलां. ह्या ईयर टॅगांत त्या जनावराचो धनी कोण हाची सविस्तर म्हायती आसता. हाका लागून गोरवां खंयसरूय सांडलीं जाल्यार तांच्या धनयाक रोखडेंच सोदप सोंपें जाता. मात मडगांवां पेडें वाठारांत एका रेड्याचेर कारवाय जाल्ली पळोवपाक मेळ्ळी. त्या रेड्याच्या कानार कसलेच तरेचो टॅग नाशिल्लो. हाका लागून ताका पुलिसांनी रोखडोच जाग्यावेल्यान उखल्लो.
पेड्यां तीन रेडे धिरयो लावपा खातीर हाडिल्ल्याची कागाळ कोणेंतरी दक्षीण गोंय जिल्लोधिकार्यां कडेन केल्ली. हे कागाळेची दखल घेवन जिल्लोधिकार्यांनी पुलीस, पशुसंवर्धन खातें आनी संबंदीत यंत्रणांक ताची चवकशी करपाचो आदेश जारी केलो. ह्या आदेशा प्रमाण पुलिसांनी घडणुके सुवातेर वचून तपासणी केली तेन्ना, एक रेडो थंय बांदिल्लो दिसलो. मात ताच्या कानाक कायद्या प्रमाण कसलेच तरेचो ईयर टॅग बसोवंक नाशिल्लो. इतल्यान थंय त्या रेड्याचो धनी पावलो. मात कायदो मोडिल्ल्यान त्या रेड्याक थंयच्यान उखलून टॅम्पोंत घातलो. उपरांत रोखडोच त्या रेड्याचो ताबो ध्यान फावंडेशना कडेन दिलो. सध्या त्या रेड्याक केपेंचे गोशाळेंत दवरला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
