भांगरभूंय | प्रतिनिधी
वर्सभरांत 16 टक्क्यांनी उणाव, पॅत्रोल गाडयांची नोंदणी 6 टक्के वाडली
भांगरभूंय । प्रतिनिधी
पणजी : केंद्र आनी गोंय सरकारान इलेक्ट्रीक गाडयांची (ईव्ही) खरेदी वाडची हे खातीर विवीध अनुदान येवजण्यो सुरू केल्यात. मात ईव्ही गाडयांचे विक्री उपरांत सेवा मेळप ना, बॅटरी समस्या, फावोशीं चार्जींग स्टेशना नासप आनी हेर विवीध कारणांक लागून ईव्ही गाडयांची खरेदींत उणाव जायत आसा. 2024 त गोंयांत 11 हजार 755 ईव्ही गाडयांची नोंदणी जाल्ली. 2025 त ही संख्या 16 टक्क्यांनी उणी जावन 9,873 जाल्या. हे मजगतीं पॅत्रोल गाडयांची नोंदणी 6 टक्क्यांनी वाडल्या.
वयल्या दोन वर्सांच्या काळांत गोंयांत पॅत्रोल गाडयांचीच विक्री चड जाल्ल्याचें स्पश्ट जालां. तातूंत पॅत्रोल आनी हायब्रीड गाडयांचो आस्पाव आसा. गोंयांत 2024 त 66 हजार 953 पॅत्रोल गाडयांची नोंदणी जाल्ली. जाल्यार 2025 त हो आंकडो 6 टक्क्यांनी वाडून 71 हजार 5 इतली जाली. गोंयांत डिझॅल आनी सीएनजी गाडयांची नोंदणी उणी जाल्या. 2024 त 5387 डिजॅल जाल्यार 221 सीएनजी गाडयांची नोंदणी जाल्ली. 2025 त 5,246 आनी 204 सीएनजी गाडयांची नोंदणी जाली.
कार्बन उत्सर्जन उणें करप, हरीत उर्जेचो वापर वाडोवप ह्या कारणां खातीर सरकारान ईव्ही खरेदी खातीर येवजण सुरू केली. सुरवेक हाका बरो प्रतिसाद मेळ्ळो, मात पॅत्रोल गाडयांचे तुळेंत ईव्ही गाडयांचे विक्री उपरांतचे सेवे संबंदांत खूबश्यो कागाळी येवपाक लागल्यो. सर्व्हिसिंगा वेळार गाडयांचे सुटे भाग मेळपाक कळाव जावप, गोंयांत फावोशे सुटे भाग उपलब्ध नासप, म्हारग सुटे भाग, गाडयांच्यो बॅटऱ्यो बंद पडप, चार्जींग स्टेशनां नासप, कंपनी सोडून हेर कडेन दुरुस्ती जावप ना, हाका लागून ईव्ही गाडयो घेवपाचो आंकडो उणो जाला.
2025 त गाडयांची सगल्यांत चड खरेदी
गोंयांत 2025 त चार वर्सांतली गाडयांची सगल्यांत चड विक्री जाल्या. 2022 त येरादारी खात्या कडेन 70 हजार 820 गाडयांची नोंदणी जाल्ली. 2023 त 81 हजार 306, 2024 त 84 हजार 319 जाल्यार 2025 त 86 हजार 333 गाडयांची नोंदणी जाली.
ईव्ही नोंदणी
वर्स – आंकडो
2022 – 5682
2023 – 9483
2024 – 11,755
2025 – 9873
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
