भांगरभूंय | प्रतिनिधी
मुख्यमंत्र्यांचो शेतकारांक उलो
लुकसाण भरपायेचे चॅक भेटयले
3.68 कोटींची मजत वितरीत
भांगरभूंय । प्रतिनिधी
सांखळी : शेती वेवसाय करतना हाचे मुखार शेतकारांनी वेवसायीक दिश्टीकोन बाळगून सामुहीक शेती करची. सामुहीत शेती येवजणेक चालना दिवचे खातीर सगल्यांनी योगदान दिवपाची गरज आसा. राज्य सरकारान सामुहीक शेती येवजणेंक पुराय 100 टक्के आदार दिला. ही येवजण पूर्णत्वा कडेन पावल्या. तशेंच फक्त भाक पिकांचेर अवलंबून रावनासतना हेर पिकां घेवचे खातीर सरकार सगले तरेची मजत करता. पावसांत जावपी शेतांचें लुकसाण टाळपा खातीर वायंगण शेतां वरवीं लेगीत व्हड प्रमाणांत फायदो जोडप शक्य आसा. ते नदरेन सरकार लेगीत सगली गरजेची मजत करपाक तयार आसा, अशें मुख्यमंत्री डॉ. प्रमोद सावंत हांणी सांगलें.
आडवेळ्या पावसाक लागून लुकसाण जाल्ल्या 3,950 शेतकारांक 3 कोटी 68 लाख रुपयांची लुकसाण भरपाय मुखमंत्री डॉ. प्रमोद सावंत हांचे हस्तुकीं वितरीत केली. ह्या वेळार ते उलयताले. ही कार्यावळ सांखळे जाली.
शेतकार हो समाजाचो घटमूट घटक आसा. बदलत्या हवामानाक लागून केल्लें कश्ट केन्ना केन्ना फुकट वतात आनी लुकसाण सोंसचें पडटा. आडवेळ्या पावसाक लागून व्हड प्रमाणांत लुकसाण जाल्ल्या शेतकारांक गोंय सरकारान पुराय तेंको दिवन दिल्लें उतर पाळ्ळां. सरकारान 3,950 शेतकारांक 3 कोटी 68 लाख रुपयांची लुकसाण भरपाय वितरीत केल्या. सरकार शेतकारांच्या फाटल्यान घट उबें आसां, हाची ही जिवी देख, अशें मुख्यमंत्र्यान सांगलें.
ज्या वेळार लुकसाण जालें त्याच वेळार सगल्या शेतकारांक अर्थीक मजत दिवपाची हमी सरकारान दिल्ली. ती 100 टक्के पुराय करपाक आमकां येस आयलां. ज्या शेतकारां कडेन कृशी कार्ड ना त्या 1200 शेतकारांक लेगीत सरकारान गरजेची मजत दिल्या. फुडल्या दोन दिसांत उरिल्ल्या शेतकारांच्या खात्यांत मजत जमा जातली, अशें मुख्यमंत्र्यान सांगलें.
वेगवेगळे पर्याय सोदतना, हळद लागवड तशेंच गोरवांच्या खाणा खातीर फोडर लागवड, चवळी, हळसांदे आनी हेर पिकांची आधुमीक तंत्रज्ञानाचो वापर करून शेती केल्यार चड फायदो जातलो. हे खातीर हाचेर अदीक लक्ष दिवप गरजेचें आसा. ते नदरेन जिल्हो पंचायतींक विशेश अधिकार दितले, अशें मुख्यमंत्र्यान सांगलें. गोंयांतल्या जिल्हो पंचायत वांगड्यांनी शेतीक नवी उर्बा दिवचे खातीर विशेश लक्ष दिवचें. हेर राज्यांनी शेतकार आत्महत्या करतात, मात गोंयांतल्या दरेका शेतकारा फाटल्यान सरकार घट उबें रावलां. ताका लागून शेतकारांक कसलेच भंय ना, अशेंय तांणी सांगलें.
आमदार डॉ. चंद्रकांत शेट्ये हांणी सांगलें, शेतकारांची जी वायट अवस्था जाल्ली ताची गोंय सरकारान प्रत्यक्ष शेतांत वचून पळोवणी केली. शेतांचो 100 टक्के इबाड जाल्लो. त्या शेतकारांक व्हड थाकाय दिवपाचें काम आमचें मुख्यमंत्री डॉ. सावंत हांणी केलां. हे खातीर तांचे विशेश उपकार मानप आमची लागणूक थारता. आमचें सरकार हें लोकांच्या हिताचेंच काम करता, हे खातीर भिवपाची गरज ना.
आमदार प्रेमेंद्र शेट हांणी सांगलें, कांय दिसां आदींच शेतकारांच्या खात्यांचेर पयशे जमा जावपाक सुरवात जाल्या, मात ते मजत मेळ्ळी अशें सांगिनात. सरकार लोकांच्या फाटल्यान उबें आसा. मुख्यमंत्री डॉ. सावंत हे दरेका मळाचेर लोकांचो आदार म्हूण वावुरतात. हे खातीर लोकांक व्हड थाकाय मेळ्ळ्या, अशें तांणी सांगलें.
कृशी संचालक संदीप फळदेसाय हांणी गोंयांतलें कृशी वेवस्थापन, विवीध येवजण्यांची म्हायती दिली. जेन्ना आडवेळ्या पावसान धुमशेण कांडून तयार जाल्लें उबें शेत आडवें उडयलें त्याच वेळार मुख्यमंत्र्यान ताकतिकेन कृशी खात्याक आदेश दिवन तत्काळ डिसेंबर मेरेन मजत वितरीत जावची हाची खबरदारी घेवपाचे निर्देश दिल्ले. मात फक्त जिल्हो पंचायत आचारसंहितेक लागून कांय दीस कळाव जालो. तरी लेगीत 100 टक्के मजत वितरीत करपाक येस आयलें, अशें तांणी सांगलें.
ह्या वेळार जिल्हो पंचायत वांगडी सुंदर नायक, महेश सावंत, पद्माकर मळीक, दया कारबोटकार, निलिमा गांवस, कृशी अधिकारी तशेंच शेतकार हाजीर आशिल्ले.
‘सामुहीक शेतीचो तीन कडेन प्रयोग’
स्वयंपूर्ण गोंय, आत्मनिर्भर गोंय ही संकल्पना प्रत्यक्षांत हाडचे खातीर जिल्हो पंचायतींक सामुहीक शेतीची संकल्पना चाली लावपाचे अधिकार दितले. सामुहीक शेती खऱ्या अर्थान फायद्याची थारतली. आमोणें, कुडणें आनी न्हावेली ह्या तीन वाठारांनी नवो प्रयोग सुरू केला. ल्हान ल्हान कुडक्यांनी शेती केल्यार फायद्याची थारची ना. ते खातीर सगल्यांनी सामुहीत शेतीच्या मार्गान फुडें वचून सरकाराच्या येवजण्यांचो 100 टक्के लाव घेवचो, असो उलो मुख्यमंत्री डॉ. प्रमोद सावंत हांणी मारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
