भांगरभूंय | प्रतिनिधी
मंत्र्यांचे आपमजत गट, एमएसएमईक संबोधन
भांगरभूंय । प्रतिनिधी
पणजीः उद्देग खात्यान गोंयांतल्या 4000 हजार उद्देजकांक प्रशिक्षण दिलां. फुडाराक 30 हजार उद्देजकांक प्रशिक्षण दिवपाची मोख खात्यान दवरला. बरेच आपमजत गट आतां एमएसएमई जावपाक पावल्यात, अशी म्हायती उद्देग, वेवसाय आनी वाणीज्य मंत्री मावीन गुदिन्हो हांणी दिली.
गोंयांतले आपमजत गट तशेंच लघू आनी सुक्ष्म उद्देगांच्या बायलां वांगड्या बरोबर लायव्ह संबोधनात मंत्री मावीन गुदिन्हो उलयताले. ह्या संबोधनांत खात्याच्या अधिकाऱ्यांनी आपमजत गट तशेंच एमएसएमई उद्देजकां खातीर कसल्यो सवलती आनी येवजण्यो आसात हाची म्हायती दिली. मंत्री गुदिन्हो हांणी उपरांत अधिकारी आनी बायलां वांगड्यांचे मार्गदर्शन केले.
सरकारी येवजणेचो लाव कसो घेवप. केंद्रीय तशेंच राज्य सरकाराचे येवजणे वरवीं माक्ना, निधी हेर गजाली लोकां मेरेन कशो पावोवप हाची म्हायती दिवपा खातीर आमी पांच तंज्ञाचे पंगड वेंचला, अशी म्हायती गुदिन्हो हांणी दिली.
कितलेशेच लोक जे पयलीं सादे आपमजत गट चलयताले ते आता एमएसएमई जावपाक पावल्यात. जे उत्पन्न ते तयार करतात तांकां वालोर आसाता. पूण तांचे मार्केटींग जायना. हे मार्केटींग जावपा खातीर आमी विशेश केंद्रा नेमल्यात. हातूंत बायलां खातीर खासा वेगळे अधिकारी नियुक्त केल्यात. बायलांनी आपमजत गट बरे भशेन चलोवन दुसऱ्या बायलांक म्हायती दिवन आमची मोख पुराय करपाक मजत करची, असो उलो गुदिन्हो हांणी मारला.
बायलां उद्देजका खातीर आमी उत्तर आनी दक्षीण गोंयांत सुविधा केंद्रा उबारल्यात. बायलांनी हांचो आदार घेवचो. पंचायत पांवड्यार फकत एका कार्यावळींत लोक उमेदीन आपले उत्पन्न विकतात. पूण ते एका दिसा पुरते मर्यादीत उरता. ह्यो कार्यावळी पंचायत पांवड्यार सुरूच उरपाक जाय, असो सल्लो गुदिन्हो हांणी दिलो.
एक हस्तकलेची वस्त गोंयांत येवपी पर्यटकांक आमी भेटवस्त म्हूण दिवपाक सोदतात. ही हस्तकला करपी लोक आसात फकत तांचे कलेक उर्बा दिवन तांका प्रोत्साहन दिवपाचेर विचार करपाक जाय. पर्यटन राज्य ह्या नवदरेन अशा कलाकारांचो सोद घेवन तंत्रगिन्यान आनी लोकांक एकठांय हाडून मुळाव्या पांवड्या वयल्या कलाकारांक उर्बा दिवपाची गरज आसा, असो हावेस गुदिन्हो हांणी उक्तायलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
