करंजाळे दर्यादेगे वयल्या नुस्त्यांनी जड धातूचें प्रमाण चड

भांगरभूंय | प्रतिनिधी

पणजीः गोंयच्या करंजाळे दर्यादेगेर धरिल्ल्या नुस्त्यांनी जड धातू चड प्रमाणांत आसता. गोंय विद्यापिठाच्या संशोधकांनी केल्ल्या नव्या वैज्ञानिक अभ्यासांतल्यान अशें दिसून आयलां. नेमान हें नुस्तें खाल्ल्यार भलायकेचो धोको निर्माण जावंक शकता अशी शिटकावणी दिल्या.
ह्या अभ्यासांत सादारणपणान खावपी जायत्या नुस्त्यांच्या जातींनी धातूचें प्रमाण परवानगी योग्य मर्यादेपरस चड आशिल्ल्याचें दिसून आयलां. दर्यादेग वाठारांतले नुस्तेंकार आनी नुस्तें खावप्यां खातीर ही हुस्क्याची गजाल. जड धातूचें प्रमाण चड आशिल्लें नुस्तें व्हड प्रमाणांत खाल्ल्यार भलायकेक हानीकारक थारूंक शकता. गोंयच्या शारी दर्यादेगेवेल्या वाठारांतल्या नुस्त्यांचें सुरक्षेचेर चड बारीकसाणेन नदर दवरपाची गरज आसा अशें संशोधनांत म्हणलां.
ए.एम. पाटील, एम.आर.नास्नोडकार आनी सी.जे.जी. फर्नांडीस हांणी करंजाळे दर्यादेगे वयल्या ‘गाळांतल्या धातूंची जैवउपलब्धता आनी खावपाक योग्य नुस्त्यांतली जैवसंचय’ ह्या अभ्यासांत गाळांतल्या धातूंचें जैवउपलब्धतेचे मूल्यांकन करप आनी नुस्त्यांच्या वेगवेगळ्या अवयवांनी म्हळ्यार स्नायू, कल्ले, यकृत, मूत्रपिंड हातूंतल्या धातूचें प्रमाण थारावपाच्या हेतान हें संशोधन केल्लें. तातूंत दर्यांतले जीव आनी मनीस ह्या दोगां खातीर विखारी परिणामांचें मुल्यांकन करपाचेर भर दिल्लो.
ह्या अभ्यासांत चडशा नुस्त्यांच्या जातींनी मूत्रपिंडांत सगळ्यांत चड धातूचें संचय दिसून आयलें. ताचे उपरांत यकृत, कल्ले आनी स्नायू हातूंत दिसला. बांगडो आनी तारलें ह्या सारक्या 11 प्रकारच्या नुस्त्यांनी धातूचें प्रमाण चड आशिल्ल्याचें दिसून आयलें.