भांगरभूंय | प्रतिनिधी
नवी दिल्ली, खबरां संस्थाः देशांतलें सुमार 70% पिवपाचें उदक दुशीत आसा. उदकाच्या दर्ज्याचे नदरेन 122 देशां मदीं भारताचो क्रमांक 120वो आसा. दुशीत उदकाक लागून देशांतल्या 60 कोटी लोकांक उदकाचो खर वा गंभीर उणाव आसा. दर वर्सा सुमार दोन लाख लोकांक दुशीत उदकाक लागून मरण येता. इंटरनॅशनल सेंटर फॉर सस्टेनेबिलिटीन उजवाडायल्ल्या अहवालांत हे आंकडे नोंद केल्यात. 2030 मेरेन देशांतल्या उदकाची मागणी उपलब्ध आशिल्ल्या पुरवणे परस दुपेटीन वाडटली असो अदमास आसा. हाका लागून लाखांनी लोकांक व्हड संकश्ट निर्माण जातलें. 2005 ते 2022 ह्या काळांत भारतांत उदकांतल्यान जावपी दुयेंती 20.98 कोटी परस चड सांपडले.
संवसारांतल्या 17% लोकांक आदार दिवपी भारतांत संवसारांतल्या वट्ट पिवपाच्या उदकांतले फकत 4% उदक उपलब्ध आसा, जें देशाक फावो तितले ना.
इंदूरा पिवपाच्या उदकाचें संकश्ट
इंदुरांतलें सगळ्यांत नितळ शार भागीरथपुरांत पिवपाच्या उदकाक लागून 16 जाणांक मरण आयलें. 1500 लोक दुयेंत पडले. 208 हॉस्पिटलांत आनी 27 आयसीयूंत आसात.
भूंयगत उदकाची समस्या कितें?
देशांतली 85% पिवपाच्या उदकाची पुरवण भूंयगत उदकाचेर निंबून आसा. मे 2023त तयार केल्ल्या 15,259 भूंयगत उदकाच्या नमुन्यांचेर आदारीत अहवालांत म्हणलां, 19.8% नमुन्यांनी नायट्रेट परवानगी दिल्ले मर्यादे परस चड आशिल्ल्याचें सांगलां. 9.04% फ्लोरायड आनी 3.55% आर्सेनिकान परवानगी दिल्ले मर्यादे परस चड आसा. कांय नमुन्यांनी लोखण (13.20%), क्लोरायड (3.07%), विद्युत् वाहकता (7.25%) आनी युरेनियम (6.60%) हे परवानगी दिल्ले मर्यादे परस चड आशिल्ल्याचें दिसून आयलें. आर्सेनिक, फ्लोरायड, युरेनियम आनी नायट्रेट हीं थेट विखारी वा दीर्घकाळ भलायकेक धोको निर्माण करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
