भांगरभूंय | प्रतिनिधी
वास्को : धा लाख रुपया आनी पांच तोळे भांगर दिले बगर लग्न जावचें ना, अशें सांगपी न्हवरो, ताचीं आवय- बापूय हांचे आड वास्को पुलिसांनी हुंडो विरोधी कायद्या खाला गुन्यांव नोंद केला. ह्या प्रकरणांत तांकां रोखडीच नोटीस काडटले. सध्या पुलिसांनी चिंबलाच्या रशिद अहमद छप्परबंद, नबी रसुल लालसाब छप्परबंद आनी बिबिजान छप्परबंद हांचे आड गुन्यांव नोंद केला. हे विशीं व्हंकलेच्या बापायन वास्को पुलीस स्टेशनाचेर कागाळ केल्ली.
पुलिसांनी दिल्ले चड म्हायती प्रमाण, मांगोरहिलचे एके चलयेचें लग्न चिंबल- पणजेच्या रशिद हाचे कडेन जावपाचें आशिल्लें. जेन्ना लग्नाचें उलोवप केल्लें तेन्ना हुंड्या विशीं कसलोच वेव्हार जावंक नाशिल्लो. २९ एप्रिलाक न्हवर्यान आनी ताच्या आवय-बापायन चलयेच्या बापाय कडेन हुंड्याची मागणी केली. लग्न थारावपाक गेल्ले तेन्ना हुंड्याचें कितेंच उलोवप जावंक नाशिल्लें. हाका लागून लग्नाच्या ऐन वेळार हुंड्याचो प्रस्न हाजीर केल्ल्यान चलयेच्या आवय- बापाय सामकार व्हड संकश्ट येवन उबें रावलें.
कागाळे प्रमाण, न्हंवरो आनी ताच्या आवय-बापायन धा लाख रुपया आनी पांच तोळे भांगराची मागणी केली. ही मागणी जर पुराय जावंक ना, जाल्यार हें लग्न जावचें ना अशीय धमकी न्हवरेकारांनी व्हंकलकारांक दिली. चलयेच्या बापायन आनी हेरांनी तांकां समजावपाचो यत्न केलो. तशेंच न्हंवरेकारांनी हुंड्याचो हट्ट धरिल्ल्यान व्हंकलेच्या बापाय मुखार पुलिशेंत वचपा बगर आनीक कांयच पर्याय उरूंक ना.
हे विशीं वास्को पुलीस उपनिरीक्षक डेव्हिड कॉस्ता फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
