भांगरभूंय | प्रतिनिधी
संवसारभर दमो (अस्थमा) आशिल्ले दुयेंती आसात. हो रोग गंभीर, ताचो संबंद सरळ स्वासा कडेन आसता. देखून ह्या रोगाचेर लक्ष दिवन उपाय करप खूब गरजेचें. जायते जाण ह्या रोगा वांगडा आपलें जिवीत जगपाक लागल्यात. संवसारीक दमो दीस दर वर्सा मे म्हयन्याच्या पयल्या मंगळारा मनयतात. दमो ह्या दीर्घकाळ चलपी स्वास घेवपाच्या दुयेंसा विशीं जागृताय करप आनी योग्य उपचार आनी जिणे पद्दती वरवीं दुयेंतींक हो रोग नियंत्रीत करपाक मार्गदर्शन करप हो ह्या दिसाचो मुखेल हेत. अस्थमा हो फुफ्फुसां कडेन संबंदीत रोग आशिल्ल्यान स्वास मार्गान सूज आनी आकुंचन निर्माण करता, जाका लागून स्वास घेवपाक त्रास, घरघर, खोंकली आनी छातयेंत जड जाल्ले वरीं जाता. योग्य काळजी घेवंक ना जाल्यार हें दुयेंस गंभीर जावपाक शकता.
गिमाचे दीस आनी अस्थमा: गैरसमज आनी वास्तव?
चडशा लोकांक दिसता, अस्थमाक लागून फकत थंडेच्या दिसांनी चड त्रास जाता. पूण तज्ञांच्या मतान हो समज पुरायपणान चुकीचो आसा. वाडत वचपी तापमान, प्रदुशण आनी पर्यावरणांतल्या बदलांक लागून गिमाच्या दिसांनी लेगीत दम्याच्या आक्रमणाचो धोको खूब वाडटा. हवेंतल्या ओझोन आनी बारीक प्रदुशक कणांचें प्रमाण गिमाच्या दिसांनी वाडटा. हे घटक श्वसनमार्गाक चाळवयतात आनी तातूंत सुज वाडटा. तेभायर उश्णतेक लागून निर्जलीकरण जावंक शकता, जाका लागून स्वास मार्गांतलो म्युकस दाट जाता आनी स्वास घेवपाक चड कठीण जाता. दम्याच्या दुयेंतींकय दमट हवामान त्रासदायक थारूंक शकता, कारण ताका लागून श्वसनमार्ग चड संवेदनशील जाता.
तेभायर सेगीत उश्णतायेक लागून थकप, उश्णतायेचो आघात, इलॅक्ट्रॉलायट असंतुलन सारकिले प्रस्न उप्रासतात, जाचो स्वासाचेर सरळ परिणाम जाता. देखूनच तज्ञांच्या मतान दम्याच्या दुयेंतींक गिमाच्या दिसांनी तशीच जतनाय घेवपाची गरज आसा.
दम्याच्या दुयेंती खातीर म्हत्वाच्यो टिप्स
-गिमाच्या दिसांनी दमो नियंत्रणांत दवरपा खातीर कांय सादे पूण प्रभावी उपाय करूं येतात.
नितळसाण सांबाळप: घरांतल्या धुल्ल, मायट्स, मोल्ड हांचे पासून पयस रावचें. नेमान निवळ करचें.
-एसी/कुलराचो सांबाळ: ताचे फिल्टर नितळ दवरात, नाजाल्यार तातूंतल्यान धुल्ल आनी जंतू पातळूंक शकतात.
-हायड्रेटेड रावचें: भरपूर उदक पियेवप खूब म्हत्वाचें. हाका लागून म्युकस पातळ उरता आनी स्वास घेवपाक सोंपें जाता.
-भायर सरतना जतनाय घेयात: धुल्ल, धुंवर वा प्रदुशण आशिल्ल्या सुवातींनी वतना मास्क घालचें.
वखदांचो नेमान वापर: इन्हेलर वा दोतोरान सांगिल्लीं वखदां वेळार वापरचीं.
ट्रिगर पासून पयस रावचें: धुंवर, अत्तर, रसायनां वा परागकण सारकिल्ल्यो गजाली टाळच्यो. ’४-४-४’ हो नेम म्हत्वाचो!
अचकीत दम्याचो आक्रमण जाल्यार भियेवप स्वाभावीक. अशे स्थितींत ४-४-४ हो नेम कामाक येता. हो नेम कितें तें पळोवया.
इनहेलर घेवचे: हाका लागून वायुमार्ग रोखडेंच उगडपाक मदत जाता. दर एका पफा उपरांत व्हडलो उस्वास घेवचो: हें वखद पुलमांवांत सारकें पावता. दर ४ मिनटांनी ही प्रक्रिया परतून करची: लक्षणां सुदारमेरेन ही प्रक्रिया चालू दवरची. ह्या उपायाक लागून तात्पुरती सुटका मेळटा, पूण स्थिती गंभीर आसल्यार बेगोबेग वैजकी मदत गरजेची आसता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
