भांगरभूंय | प्रतिनिधी
डॉ. कल्पना महात्मे : 2025 त एकल्याकूय मरण ना
भांगरभूंय । प्रतिनिधी
पणजी : गोंयांत 2025 त डेंग्यूचे वट्ट 105 दुयेंती सांपडिल्ले. हो फाटल्या 11 वर्सांतलो सगल्यांत उणो दुयेंतींचो आंकडो थारला. भलायकी खात्यान केल्ली जागृताय, हॉटस्पॉट सुवातांची तशेंच घराघरांनी वचून केल्ली तपासणी, जळारांच्यो पैदास सुवातो नश्ट करप, हेर खात्यां वांगडा समन्वय अश्या उपाय येवजण्यांक लागून डेंग्यूचे दुयेंती उणें जाले. 2025 त डेंग्यूक लागून एकल्याय दुयेंतीक मरण येवंक ना, अशें राष्ट्रीय वेक्टर बोर्न दुयेंस नियंत्रण कार्यावळीची उपसंचालिका डॉ. कल्पना महात्मे हांणी सांगलें.
महात्मे हांणी सांगलें, गोंयांत 2024 त डेंग्यूचे 567 दुयेंती सांपडिल्ले. दुयेंतींचो आंकडो उणो करचे खातीर 2025 त भलायकी खात्यान चड खर उपाय येवजण्यो चालीक लायल्यो. ते प्रमाण परतून परतून डेंग्यू सांपडपी म्हणल्यारूच डेंग्यू हॉटस्पॉट सुवातांचेर तपासणी केली. खात्याच्या कर्मचाऱ्यांनी अश्या वाठारांत घराघरांनी वचून पळोवणी केली. लोकांक घर तशेंच सरभोंवतणचो वाठार नितळ दवरपाच्यो सुचोवण्यो केल्यो. गरजेचे सुवाते वयलो कोयर काडलो, वखदां मारलीं. ते फायर मुळाव्या तशेंच नागरी भलायकी केंद्रांत जोरा खातीर आयिल्ल्या दरेका दुयेंतीची डेंग्यू तशेंच मलेरिया खातीर लेगीत तपासणी केली. हाका लागून डेंग्यूचे दुयेंती वळखून तांचेर उपचार करप चड सोंपें जालें.
2025 त सांपडिल्ले चडशे डेंग्यूचे दुयेंती हे स्थलांतरीत वस्तींतले आशिल्ले. बांदकामाच्या सुवातांचेर उदक उक्तडार सांठयताले. अश्या सुवातांचेर लेगीत कांय दुयेंती सांपडिल्ले. जाल्यार कांय दुयेंती हे दुसऱ्या राज्यांतले डेंग्यू हॉटस्पॉट वाठारांतल्यान गोंयांत आयिल्ले, अशें डॉ. महात्मे हांणी सांगलें.
‘वेळारूच लक्षणां वळखप गरजेचें’
डेंग्यू खातीर सरकारी हॉस्पिटलांत बऱ्या दर्जाच्यो सुविधा फुकट उपलब्ध आसात. डेंग्यूचीं लक्षणां वेळारूच वळखप गरजेचें आसा. जोर देंवप ना, पोटांत खूब दुखप, घाम येवप वा कुडकुडो खावप, ओकपाक येवप अशीं लक्षणां आसल्यार तत्काळ लागींच्या भलायकी केंद्रांत वचप गरजेचें आसा.
वर्स – दुयेंतीं – मरण
2015 – 293 – 0
2016 – 150 – 0
2017 – 235 – 0
2018 – 335 – 1
2019 – 726 – 1
2020 – 376 – 0
2021 – 649 – 0
2022 – 443 – 1
2023 – 512 – 3
2024 – 567 – 3
2025 – 105 – 0
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
