भांगरभूंय | प्रतिनिधी
– गोंय सरकाराच्या कार्मीक खात्याचो आदेश
– सरकारी खातें, म्हामंडळां आनी स्वायत्त संस्थांच्या कर्मचाऱ्यांक शिटकावणी
भांगरभूंय | प्रतिनिधी
पणजी : लोकांक योग्य सरकारी सेवा मेळपाक जाय, कचेरेंत गेल्यार तांचीं कामां रोखडींच, वेळांत जावपाक जाय, प्रशासन हें सुशासन जावपाक जाय म्हूण सरकार दीस रात एक करता. सरकारी काम बेगीन जायना अशी आदली एक म्हण आसा. ती म्हण फटीची थारोवपा खातीर सरकारान कर्मचाऱ्यांक जाग्यार हाडपाक सुरवात केल्या. अदीं मदीं कचेऱ्यांनी आमदार- मंत्री भेट दिवन कर्मचाऱ्यांची हाजेरी पळयतात, कितले वेळार कामाक येतात. कितले जाण थंय आसतात हें पळयतात. तांच्या हे भुमिकेक लागून कर्मचारी कांय प्रमाणांत जाग्यार येवपाक लागल्यात.
आतां सरकाराचे नदरेक व्हडली गजाल आयल्या, ती म्हणल्यार कितलेंशेच सरकारी कर्मचारी हे कलाकार आसात, आनी आपले कलेचो वापर ते वेवसायीक स्वरुपांत करतात. तांच्या ह्या वेवसायीक स्वरुपाच्या कामां खातीर प्रशासनांतल्या कामांचेर, लोकांक मेळपी सेवांचेर परिणाम जावपाक लागला. ते खातीर गोंय सरकाराच्या कार्मीक खात्यान अश्या कर्मचाऱ्यां खातीर थेट आदेशूच काडला. सरकारी खातीं, महामंडळां आनी स्वायत्त संस्थांचे कर्मचारी वेवसायीक सुत्रसंचालना सारक्यो गजाली करतात. जाका लागून तांचे कामगिरीचेर आनी सरकारी कामां कडेन समर्पणाचेर परिणाम जाता अशें सरकारान आदेशांत म्हणलां.
सीसीएस (आचरण) नेम, 1964 च्या नेम 3 आनी 15 प्रमाण हो आदेश जारी केला. सरकारी कर्मचाऱ्यांनी आपलो पुराय वेळ अधिकृत कामां खातीर दिवंक जाय आनी हेर खंयच्याय वेवसायांत वा नोकरेंत वांटो घेवपाक बंदी आसा अशें ह्या नेमांत सांगलां. सरकारी खातीं, म्हामंडळां आनी स्वायत्त संस्थांच्या सगळ्या अधिकाऱ्यांनी ह्या नेमांक खर पाळो दिवचो आनी अशा वेवसायीक कामांत वा वेवसायीक पुनर्रोजगारांत वांटो घेवचो न्हय अशी सुचोवणी दिल्या, ना जाल्यार सीसीएस (आचरण) नेम, 1964 चो भंग केला म्हूण कारवाय जातली, अशी शिटकावणी दिल्या. ह्या आदेशा प्रमाण आतां सरकारी कर्मचाऱ्यांक कामा वेळार भायर सुत्रसंचालन करपाक वा हेर वेवसायीक कामां करपाक बंदी आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
