भांगरभूंय | प्रतिनिधी
आझादी का अमृत महोत्सवा निमतान आडपय गांवचे कलाकार सागर नायक- मुळे हांणी आपल्या घरा लागसार लॅण्ड आर्ट तयार केलां. ही लक्षवेधी कलाकृती सध्या आडपय गांवचें आकर्शण थारल्या.
सागर मुळे हांणी आपली संकल्पना गांवच्या लोकांक सांगली. तांणी मुळे हांकां तेंको दिलो, सहकार्य करपाचें उतर दिलें. लोकांनी दिल्ल्या सहकार्याक लागून नदर ओडून घेवपी ही कलाकृती साकारूंक पावली.
हालींच प्रधानमंत्री नरेंद्र मोदी हांणी आपले ‘मन की बात’ कार्यावळींतल्यान सागर मुळे हांचे कावी कलेची तोखणाय केल्ली. ताका लागून सागर मुळे हांचें नांव लोकांच्या ओंठार घोळूंक पाविल्लें.
मानादीक प्रधानमंत्री नरेंद्र मोदी हांणी म्हजे कलेची दखल घेतिल्ल्यान म्हाका स्फूर्त मेळ्ळी, एके तरेची प्रेरणा मेळ्ळी आनी तातूंतल्यान हें लॅण्ड आर्ट साकारलें. आझादी का अमृत महोत्सवा निमतान कितें तरी आगळें करचें अशें मनांत घोळटालें. तातूंतल्यानूच लॅण्ड आर्टाची संकल्पना तकलेंत आयली. गांवच्या लोकां कडेन हे विशीं उलयलों. तांणी प्रोत्साहन दिलें, तेंको दिलो, सहकार्य दिलें आनी तातूंतल्यान हें लॅण्ड आर्ट साकार जालें. भारतीय स्वातंत्र्य लढ्यांतल्या हुतात्म्यांक आर्गां ओंपपाच्या हेतान हांवें हें लॅण्ड आर्ट तयार केलां अशें सागर मुळे सांगतात.
सागर मुळे हांणी खोऱ्याचो वापर करून ही कलाकृती साकारल्या. भारताच्या तिरंग्याचे रंग घालून केल्लें हें लॅण्ड आर्ट नदर ओडून घेता आनी ह्या लॅण्ड आर्टाचो मोबायला वयल्यान वा कॅमेऱ्यांतल्यान फोटो घेवपाचो मोह आवरप कठीण जाता.
शेनवारा, 13 आॅगस्टाक हे कलाकृतीचें उक्तावण जालें. ही कलाकृती आतां लोकांक पळोवपाक उक्ती आसतली. भारताक स्वातंत्र्य मेळळ्यार 75 वर्सा पूर्ण जाल्यांत. ते निमतान भारत भुंयेक मान दिवपा खातीर आनी देशा विशींचो अभिमान बाळगुपा खातीर भारतभुंयेर सागर मुळे हांणी केल्ली ही अफलातून कलाकृती पळोवपाक लोकांनी मुजरत आडपय गांवांत भेट दिवची.
श्रृती आडपयकार
7385033224
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
