भांगरभूंय | प्रतिनिधी
पणजी: गोंयचे जनतेक संकश्टाच्या काळांत रोखडीच मजत मेळचे खातीर मुख्यमंत्री डॉ. प्रमोद सावंत हांणी आपत्कालीन प्रतिसाद मदत प्रणालीचो सविस्तर आढावो घेतलो. मंत्रालयांत जाल्ले हे बसकेंत मुख्यमंत्र्यांनी फकत आपत्कालीन सेवाच न्हय, जाल्यार केंद्र सरकाराचे खासा निधींतल्यान सुरू आशिल्ल्या ५१२.९१ कोटी रुपयांच्या विवीध उदरगतीच्या कामांची स्थिती जाणून घेतली. पांयांभूत सुविधा आनी अर्थीक उदरगतीक गती दिवपी हे सगळे प्रकल्प थारिल्ल्या वेळार पुराय करपा खातीर राज्य सरकार पुरायेन बांदील आशिल्ल्याचें मुख्यमंत्र्यान ह्या वेळार ठामपणान सांगलें.
हे बसकेंत मुखेलपणान आपत्कालीन सेवांची कार्याची तांक वाडोवपाचेर भर दिली. खंयच्याय संकश्टाच्या वेळार मजती खातीर लागपी वेळ उणो करप हें सरकाराचो मुळावो हेत. हाका लागून ऍम्बुलन्स सेवा आनीक घटमूट करप आनी दुचाकी आधारीत आपत्कालीन विभागांत सुधारणा करपाच्यो सुचवण्यो दिल्यात. तशेंच, पयल्या प्रतिसादा खातीर प्रशिक्षण कार्यावळींचो विस्तार करपाचेरूय चर्चा जाली. वैजकी आपत्ती वा बचाव कार्या मजगतीं नागरिकांक वेगान आनी अचूक मजत मेळचे खातीर एक घटमूट नेटवर्क तयार करपाच्यो सुचवण्यो मुख्यमंत्र्यान संबंदीत विभागांक दिल्यात.
दुसरे कडेन केंद्र सरकाराच्या विशेश सहाय्यता निधींतल्यान राबोवपी ५१२ कोटींच्या प्रकल्पांविशीं उलयतना मुख्यमंत्र्यान प्रशासकी कळावा विशीं खर भुमिका घेतली. तांत्रीक वा हेर कारणांक लागून आडकून उरिल्लीं कामां वेगान करपाचे निर्देश तांणी दिले.
हो निधी फकत खर्चा खातीर न्हय, तातुंतल्यान दर्जेदार मुळाव्या सुविधांची निर्मिती जावची, जाचो सरळ फायदो राज्याचे अर्थवेवस्थेक आनी जनतेक जातले,अशें तांणी स्पश्ट केलें. हे म्हत्वाचे बसकेक मुखेल सचीव, पुलीस महासंचालक, कायदो सचीव, जिल्लोधिकारी आनी विवीध विभागांचे वरीश्ठ अधिकारी हाजीर आशिल्ले. सगल्या विभागांनी समन्वयान काम करून भौशीक सेवा अदीक सुरळीत आनी नागरीक-केंद्रीत करची, असो उलो तांणी मारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
