भांगरभूंय | प्रतिनिधी
नाजाल्यार वीज कनेक्शन तोडटले : रोखडीच भौशीक कळोवणी
पणजी : गोंय वीज विभाग (जीईडी) गिरायकांक तांचे वीज मीटर घरा भायर हालोवपा खातीर आनीक मुजत दितलें. हे विशीं एक नवी भौशीक कळोवणी जारी करपाची शक्यताय आसा, जाका लागून ‘मिटर रिडर’ कर्मचार्यांक तो सहज पळोवपाक मेळटलो.
ह्यान पयलीं विभागान शिटकावणी दिल्ली, जर मिटर सहज दिसतलो अशे सुवातेर स्थलांतरीत करूंक ना, जाल्यार वीज जोडणी काडटले. मात, सरकारान आतां अशी खर कारवाय करचे पयलीं आनीक वेळ दिवपाचो निर्णय घेतला. जीईडीच्या एका वरिश्ठ अधिकार्यान सांगलें, नवी निमाणी मुजत बेगीनूच जाहीर करतले.
फाटल्या वर्सा नोव्हेंबरांत आदली निमाणी मुजत सोंपली तेन्ना, ज्या ३८,००० गिरायकांचे मिटर घरांनी आशिल्ले आनी मिटर रिडराक ते सोदचे पडटाले. तांतलीं सुमार ६५ टक्के गिरायकां आदेश पाळपाक अपेशी थारिल्लीं. उपरांत, जीईडीच्या वरिश्ठ अधिकार्यांनी अशा गिरायकांचें लायटीचें कनेक्शन तोडून उडोवपाची प्रक्रिया सुरू करपाचो विचार सुरू केल्लो. मात सरकारान हस्तक्षेप करून विभागाक ही कारवाय आडावपाक लायली, अशी म्हायती भितरल्या गोपांनी दिली.
मिटर रिडराक रिडींग घेवपाक सोंपें पडचें हे खातीर गिरायकांक तांचे वीज मिटर घरा भायर सहज पळोवपाक मेळटा अश्या जाग्यार स्वता लावपाक सांगपी पयली कळोवणी फाटल्या वर्सा मे म्हयन्यांत दिल्ली. हे खातीर स म्हयन्यांचो काळ दिल्लो, जो फाटल्या वर्सा २८ नोव्हेंबराक सोंपलो. ह्या काळांत मुखेल विद्युत अभियंतो स्टीफन फर्नांडीस हांणी खुबश्यो भौशीक कळोवण्यो जारी करून शिटकावणी दिल्ली, मिटर हालयना जाल्यार वीज कायद्या खाला लायट काडपा वांगडाच खर अर्थीक दंडात्मक कारवाय करतले. मात, तातूंत आतां बदल करतले, वीज मिटर घरा भायर दिसतले अशे सुवातेर हालोवपा खातीर मुजत वाडोवन दितले अशें अधिकार्यान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
