भांगरभूंय | प्रतिनिधी
विरोधी पक्ष फुडाऱ्यांचें मुख्यमंत्र्यांक पत्र
पणजीः गोंयच्या भाजपा सरकारान अस्मिताय दीस ही राज्य पांवड्या वेली कार्यावळ म्हूण मनयतले अशें आस्वासन दिल्लें आसलें तरी 2025 वर्सा हो दीस मनयलो ना. ह्या वर्सा सावन तरी हो दीस मनोवचो अशी मागणी विरोधी पक्ष फुडारी युरी आलेमांव हांणी केल्या.
मुख्यमंत्री डॉ. प्रमोद सावंत हांकां बरयिल्ल्या पत्रांत अलेमांव हांणी म्हणलां, 19 जुलय 2024 दिसा म्हज्या खाजगी वांगड्याच्या प्रस्तावाक जाप दितना मुख्यमंत्री डॉ. प्रमोद सावंत हांणी विधानसभेंत अस्मिताय दीस हो राज्य पांवड्यार मनयतले अशें आस्वासन दिलें. पूण हें आस्वासन आसून लेगीत आनी ह्या अस्मिताय दिसाक इतिहासीक आनी भावनीक म्हत्व आसून लेगीत जानेवारी 2025 त कसलोच औपचारीक सुवाळो वा राज्यव्यापी सुवाळो आयोजीत केलो ना.
आस्वासन दिलें उपरांत एका वर्सा उपरांत हे संबंदीत अधिसुचोवणी जारी केल्या. पूण अंदूं अस्मिताय दीस राज्य पांवड्या वेली कार्यावळ म्हणून मनयतले काय ना असो प्रस्न तांणी विचारला.
आलेमांव हांणी ह्या पत्रांत म्हणलां, 16 जानेवारी 1967 ह्या दिसा जाल्लो ओपिनियन पोल दीस हो स्वतंत्र भारताच्या इतिहासांतलो एक आगळोच प्रयोग आसा, जंय एका वाठारांतल्या लोकांक तांच्या राजकी फुडारा विशीं निर्णय घेवपाची संद मेळ्ळी.
लोकशायेचो हो एक धाडशी प्रयोग आशिल्लो, जो भारताचे पयले प्रधानमंत्री पंडित जवाहरलाल नेहरू हांच्या दूरदृश्टीक आनी कारभाराक लागून शक्य जालो. गोंयच्या लोकांच्या आकांक्षांचो, संस्कृतायेचो आनी अस्मितायेचो तांणी आदर केलो, अशें आलेमांव हांणी पत्रांत नमूद केलां.
आलेमांव हांणी फुडें म्हणलें, हो दीस गोंयची अस्मिता, गोंयच्या लोकांच्या सामुहीक निर्णयांचो आदर करपा विशीं आनी राज्याची अस्मिताय थारावपी मुल्यांची राखण करपा विशीं आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
