भांगरभूंय | प्रतिनिधी
नव्या दरवाडीचो घरगुती, वेवसायीक, उद्देगीक क्षेत्रांतल्या गिरायकांक फटको
पणजी: म्हारगायेन त्राशिल्ल्या नागरिकांक आतां वीज दरवाडीचो शॉक बसपाचो आसा. जोड वीज नियामक आयोगान (जेईआरसी) 2025-26 ते 2029-30 ह्या पांच वर्सां खातीर वर्सुकी सरासरी 4 टक्क्यांची दरवाड मंजूर केल्ली. ही दरवाड 1 ऑक्टोबरा सावन लागू जाल्ली. वीज खात्यान ऑक्टोबर अखेरेक हेविशींची अधिसुचोवणी जारी केल्ली. उपरांत खात्यान डिसेंबर म्हयन्यांत दरवाड लागू करपाचो निर्णय घेतलो. ताका लागून नव्या वर्सांत येतल्या वीज बिलाक लागून दरवाडीचो शॉक लागतलो.
मेळिल्ले म्हायती प्रमाण, वीज खात्यान 2025-26 ते 2027-28 खातीर 4.8 ते 5.9 टक्क्यांची दरवाड करपाचो प्रस्ताव दिल्लो. नव्या दरवाडीचो घरगुती, वेवसायीक, उद्देगीक क्षेत्रांतल्या गिरायकांक फटको बसतलो.
दरवाडी उपरांत उणो दाब आशिल्ल्या घरगुती गिरायकांक 0 ते 100 युनिटा मेरेन प्रती युनीट 1.95 रुपया, 101 ते 200 युनिटा खातीर प्रती युनीट 2.90 रुपया, 201 ते 300 युनिटा खातीर प्रती युनीट 3.90 रुपया, 301 ते 400 युनिटा खातीर प्रती युनीट 5.15 रुपया जाल्यार 400 युनिटाचे वयर 6.20 रुपया प्रती युनीट शुल्क आकारतले.
अर्थीक वर्स 2029-30 मेरेन ही दर वाडत वतली. फाटल्या वर्सा मे म्हयन्यांत दरवाडी विशीं जनसुनावणी जाल्ली. ह्या वेळार विवीध थरांतल्या गिरायकांनी, उद्देगीक संघटणांनी दरवाडीक विरोध केल्लो. पूण वीज खात्यान गिरायकांची वीज पुरवण करपा खातीर प्रती युनीट चड खर्च जायत आशिल्ल्याचें सांगिल्लें. हो खर्च भरून काडपा खातीर दरवाड गरजेची आशिल्ल्यान खात्यान आयोगाक सांगिल्लें.
वीज मिटर स्थलांतरा खातीर आनीक वेळ
खात्यान घरां भितर वा रिडींग घेवप कठीण आशिल्ल्या सुवातां वेले वीज मिटर सहजतायेन रिडींग घेवंक मेळटलें अशे सुवातेर हालोवपाची सुचोवणी केल्ली. मिटर योग्य सुवातेर बसोवपा खातीर गिरायकांक 28 नोव्हेंबर मेरेन मुजत दिल्ली. हे खातीर आतां खात्या वतीन अानीक थोडो वेळ दिवपाची शक्यताय आसा. हे विशीं खात्या वतीन रोखडोच निर्णय घेतले. गोंयभर अशे सुमार 40 हजार मिटर आसात. मिटराची सुवात बदलपा खातीर सुमार 10 हजार गिरायकांचे अर्ज आयल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
