भांगरभूंय | प्रतिनिधी
ख्रिसमस लागीं पावलो काय लोकांक नव्या वर्साचीय सुलूस लागता. केन्ना एकदा 31 डिसेंबर येता आनी आमी नव्या वर्सांत पावल दवरतात, अशें तांकां जाता. चातक सुकणें पावस केन्ना येतलो हाची वाट पळयत आसता तशीच आमची नवी पिळगी पंदरा दीस पयलीं तरेकवार कार्यावळींचें नियोजन करता. नाच, आॅर्केस्ट्रा, गावपाची सर्त, बायलां खातीर रांदपाची सर्त, फुगडी, रांगोळी सर्तीची तयारी केल्ली आसता. वाड्यावाड्यार बायलां एकठांय जमतात. नाचाची तालीम करतात.
आदल्या तेंपार असले कार्यक्रम, सर्ती नासताल्यो. आयची तरणाटी पिळगी सगल्या कामानी मुखार. कसलीय कार्यावळी जाली काय ते ताची तयारी नेटान करतात. थोडे मात मस्ती करतात. कांय जाण बियर पितात. चलयांचीं फकांडां करतात. रातभर वाड्यार धुमशेणां आसतात. ल्हान भुरग्यांक, जाण्ट्यांक हाचे त्रास जातात. कांय जाण रस्तो आडावन येवपी- वचपी लोका कडल्यान पयशे घेतात. आमच्या गोंयांत असले प्रकार खूब जातात. हें चुकीचें.
हें वर्स आमचें न्हय. तें इंग्लीश लोकांचें. हे दीस आमचे क्रिस्तांव भाव, भयणां इगर्जेंत वचून परंपरे प्रमाण नवें वर्स मनयतात. चर्चींनी येशू क्रिस्ताची प्रार्थना करतात आनी हॅपी न्यू इयर म्हूण एकमेकांक परबीं दिवप, ही तांची परंपरा. बोवाळ, धुमशेणां घालचे परस ही परंपरा सगल्यांनी आपणावंक जाय. अर्दकुटीं उरिल्लीं कामां पुराय करपाची जिद्द बाळगप गरजेचें. सरकारान बेकारांक जगपापुरती नोकरी दिवपाचें आस्वासन दिवपाक जाय. सुखी जिविताची नवी सुरवात करून नव्या वर्साक येवकार दिवंक जाय.
हांव तरणाटे पिळगेक इतलेंच सांगूंक सोदतां, नवें वर्स शांतीकायेन, उमेदीन, एकमेकांक परबीं दित मनयात. नव्या वर्सा उरिल्लीं कामां पूर्ण करपाचो सोपूत घेयात. ते खातीर जाय ती जिद्द, चिकाटी, आत्मविस्वास बाळगात. वायट व्यसनां सोडटले, असो सोपूत घेयात. नवे संकल्प करात, नव्यो येवजण्यो आंखात. अडिल्ल्यांक मजतीचो हात दियात. जाण्ट्यांक आदार दियात. येवजिल्ल्या कामांत तुमकां येश मेळूं हें देवा लागीं मागणें. सगल्यांक नव्या वर्साचीं परबीं. हॅपी न्यू इयर 2026.
सिद्धी तिळवे
फोंडें
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
