भांगरभूंय | प्रतिनिधी
उदका खात्याच्या विभागाक भेटयलें निवेदन
भांगरभूंय । प्रतिनिधी
दिवचल : धनगरवाडो सावरधाट (दिवचल) वाठारांतल्या लोकांक सदांच अनियमीत उदका पुरवणेक लागून त्रास सोंसचे पडटात. गांवांत दिसांतल्यान आळीपाळीन दोन वरां उदका पुरवण जाता. थळाव्या लोकांक सतावपी ही समस्या अजून सुटिल्ली ना. ते खातीर उदक पुरवण खात्यान तत्काळ ही समस्या पयस करची, अशी मागणी करपी निवेदन गोमंतक धनगर समाजीक विकास मंडळ, दिवचल म्हाल फांट्या वतीन दिलीप वरक, तशेंच गांवांतल्या सुमार 40 लोकांनी दिवचलच्या उदका खात्याच्या विभागाक सादर केलें.
ह्या वेळार थळाव्या लोकांनी आपली व्यथा मांडली. नेमान उदक येनाशिल्ल्यान गोरवांचे हाल जातात. घरांतल्या लोकांक लेगीत खूब त्रास सोंसचे पडटात. हे संबंदांत ताकतिकेन उपाय येवजण करपाची नेटाची मागणी थळाव्या लोकांनी केली.
सावरधाट गांवची लोकसंख्या सुमार 350 ते 400 आसा. सुमार 50 टक्के लोक तांचें पोट भरपाचें मुळावे साधन म्हूण दूद वेवसायाचेर अवलंबून आसात. फावोशें आनी नेमान उदक पुरवण फक्त घरांतल्या वापरा खातीरूच न्हय जाल्यार दूद वेवसायाच्या कामां खातीर लेगीत गरजेची आसा. परतून परतून उप्रासपी उदकाच्या उणावाक लागून गांवच्या लोकांक खुबूच त्रास सोंसचे पडटात, जाचो थेट तांच्या दिसपट्टे जिणेचेर आनी उत्पन्नाचेर परिणाम जाता, अशें निवेदनांत स्पश्ट केलां.
उसप ते सावरधाट गांवां खातीर स्वतंत्र उदका पुरवण करपी पायपलायन प्रस्तावीत केल्या. ती ताकतिकेन पुराय करून खूब काळाचो प्रस्न सोडोवचो, अशी मागणी लोकांनी केल्या. मजगतीं, ह्या संबंदांत योग्य ती कार्यवाही करून उदका पुरवण नेमान करपाचे सगले तरेचे यत्न करतले, अशी हमी अधिकाऱ्यांनी दिल्या.
समस्या सोडयतले : डॉ. चंद्रकांत शेट्ये
सावरधाट गांवांतल्या लोकांक नेमान पियेवपाचें उदक मेळचें हे खातीर 10 एमएलडी प्रकल्पाचें नियोजन केलां. कच्चें उदक लोकांक मेळचें हे खातीर विशेश पायपलायन घालपाचें काम सुरू आसा. मात कोणें तरी फोन करून तें बंद करपाक सांगिल्ल्यान सध्या तें बंद आसा. ह्या संबंदांत आपणे वरिश्ठ अधिकाऱ्यां कडेन चर्चा केल्या. हो प्रस्न सुटचो हे खातीर आमचे नेमान यत्न चल्ल्यात, अशें दिवचलचे आमदार डॉ. चंद्रकांत शेट्ये हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
