अपक्षान सरकाराक तेंको दिल्यार चूक कांयच ना

भांगरभूंय | प्रतिनिधी

दामू नायक : विरोधी उमेदवाराकूय उदरगत करून घेवपाचो आसता अधिकार

भांगरभूंय । प्रतिनिधी

पेडणें : उदरगती खातीर खंयच्याय जिल्हो पंचायत वांगड्यान जो अपक्ष म्हूण वेंचून आयला, ताणें सरकाराक तेंको दिलो आनी उदरगतीचीं कामां करून घेतलीं जाल्यार तातूंत कांयच चूक ना, अशें भाजप प्रदेशाध्यक्ष दामू नायक हांणी सांगलें.

हालींच जिल्हो पंचायतीचे वेंचणुकेंत हरमल जिल्हो पंचायत मतदारसंघांतल्यान भाजपाची उमेदवार मनिषा संतोष कोरखणकार हिका 54 मतांनी हारोवन अपक्ष उमेदवार राधिका उदय पालयेंकार जिखून आयली. सोंमतेच राधिका हांकां मुख्यमंत्री डॉ. प्रमोद सावंत हांणी परबीं दिलीं. दामू नायक अटल स्मृती संमेलन कार्यावळीक मांद्र्यां आयिल्ले त्या वेळार हे संबंदांत पत्रकारांनी तांची प्रतिक्रिया विचारली, तेन्ना दामू नायक हांणी वयली जाप दिली.

भाजपाच्या कार्यकर्त्यांनी तन- मन- धन ओंपून आपलो उमेदवार जिखचो हे खातीर खर मेहनत घेतिल्ली. पूण खूब उण्यां मतांनी राधिका पालयेंकार जिखली. मुख्यमंत्री डॉ. सावंत हांणी तिका हुनहुनीत परबीं दिली. त्या वेळार हरमल मतदारसंघांतल्या निश्ठावंत भाजप कार्यकर्ते, समर्थकांच्या तोंडाचेर नाराजी दिसताली. सोशल मिडियाचेर आरत्यो परथ्यो प्रतिक्रिया लोक उक्तायताले. हे संबंदांत दामू नायक हांकां पत्रकारांनी प्रस्न विचारलो.

हाचेर दामू नायक हांणी सांगलें, ज्या वेळार एकादो अपक्ष उमेदवार वेंचून येता, तेन्ना ताका तूं आमचो न्हय, तूं कुशीक राव, अशें म्हणप योग्य न्हय. कारण सरकार वेगळें आनी पक्ष वेगळो आसता. आपापल्या उमेदवाराक जिखून हाडचे कातीर राजकी पक्षां वांगडाच हेर लोकूय नेटान यत्न करतात. ते उपरांत जर एकादो अपक्ष उमेदवार जिखून आयलो आनी तो जर सरकाराक तेंको दिता जाल्यार सरकार तो कित्याक न्हयकारतलें? आपल्या मतदारसंघांतलीं कामां जावचीं हे खातीर अपक्ष उमेदवार सरकाराक तेंको दितात, अशें तांणी सांगलें.

विधानसभा वेंचणुके वेळार मगो आनी भाजप एकामेका आड उबे आशिल्ले. जिखून आयले उपरांत मगोन भाजप सरकाराक तेंको दिलो. तेंको मेळ्ळे उपरांत राज्य स्थीर जाता, सरकार लेगीत स्थीर जाता आनी उदरगतीक प्राधान्य मेळटा, अशें दामू नायक हांणी सांगलें. जे जे सरकाराक तेंको दितले, तांचो तेंको सरकार घेतलेंच. आनी विरोधी लोकप्रतिनिधींची कामां करचीं न्हय, अशें कोणें सांगलां? लोकशायेच्या माध्यमांतल्यान विरोधी पक्षाचो उमेदवार जिखून येता. ताका उदरगत करून घेवपाचो तितलोच अधिकार आसता, अशें दामू नायक हांणी सांगलें.