भांगरभूंय | प्रतिनिधी
मडगाव: बेताळभाटी दर्यादेगेर दवरिल्ल्या रांपणीच्या नुस्तेंमारी जाळ्याक फोगाच्या किटाळ्यांक लागून उजो लागिल्ल्याची घडणूक घडली. ह्या उज्यांत नुस्तेंमार सांतान फर्नांडीस हाका सुमार १३ लाख रुपयांचें लुकसाण जाले, पर्यटकांनी नव्या वर्साच्या येवकारा खातीर मारिल्ल्या फोगाक लागून हो उजो लागलो असो दावो तांणी केला.
हे विशीं मेळिल्ले चड म्हायती प्रमाण, बेताळभाटी दर्यादेगेर नुस्तेंकार आपलीं जाळीं सांठोवन दवरतात. सांतान फर्नांडीस हांच्या मालकीचें रांपणेचें जाळें बुधवारा दर्यादेगेर दवरिल्ले. बिरेस्तारा सकाळीं फर्नांडीस हे दर्यादेगेर पावले तेन्ना तांकां आपलें जाळें लासून गोबोर जाल्ल्याचें नदरेक आयलें.
नव्या वर्साक येवकार दिवपाक कोलवा आनी बेताळभाटी दयारदेग वाठारांत व्हड गर्दी आशिल्ली. रातीं पर्यटकांनी लायिल्ल्या फोगाच्यो किटाळ्यो जाळ्याचेर पडिल्ल्यान हो उजो लागलो. उजो लागतांच थळाव्यांनी आनी जीवरक्षकांनी तो पालोवपाचो यत्न केलो. मडगांव उजो पालोवपी दळाकूय संपर्क केलो. मात ते थंय पावतासर व्हड लुकसाण जाल्लें.
ह्या उज्यांत सांतान फर्नांडीस आनी डोमराड फर्नांडीस हांचें मेळून १३ लाखांचें लुकसाण जालां. जाळें लाशिल्ल्यान तांचो रांपणेचो वेवसाय पुरायेन बंद पडला. हाका लागून राज्य सरकार आनी मत्स्योद्योग खात्यान हे घडणुकेची गंभीर दखल घेवन लुकसाण भरपाय दिवपाची मागणी पिडेस्त नुस्तेंमार्यांनी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
