भांगरभूंय | प्रतिनिधी
न्यूयाॅर्क : २०२५ हें वर्स झुजां, फारपेट आनी हिंसक घडणुकांचें वर्स आशिल्लें. तशेंच ह्या घडणुकांची कव्हरेज दिवपी पत्रकारां खातीर हें वर्स खूब धोक्याचें आशिल्लें. आंतरराष्ट्रीय पत्रकार महासंघान बिरेस्तार (१ जानेवारी) जाहीर केल्ल्या अहवाला प्रमाण २०२५ वर्सा संवसारभरच्या वट्ट १२८ पत्रकारांक मरण आयलां.
आयएफजेच्या म्हणण्या प्रमाण, हो आंकडो २०२४ वर्साच्या तुळेंत वाडिल्लो आसा. एएफपी कडेन उलयतना फेडरेशनाचे सरचिटणीस अँथनी बेलांजर हांणी सांगलें, हो आंकडो फकत एक आंकडो न्हय, तर संवसारभरांतल्या पत्रकारांक शिटकावणी दिवपाची शिटकावणी.
ह्या अहवालांत पॅलेस्टायन प्रदेशां विशीं खासा हुस्को उक्तायला. इझ्राएल-हमास झुजांत फकत गाझा हांगाच ५६ पत्रकारांक मरण आयलें. इतल्या ल्हानशाच काळांत, इतल्या ल्हान वाठारांत इतल्या जाणांक मरण आयिल्लें आमी केन्नाच पळोवंक ना. अशें बेलांगर हांणी नदरेक हाडलें.
गाझा भायर यॅमॅन, युक्रेन, सुदान ह्या संघर्शांनी भरिल्ल्या आनी राजकी नदरेन अस्थीर आशिल्ल्या वाठारांनी पत्रकारांक मरण आयलां. पेरू, भारत ह्या सारक्या देशांनीय पत्रकारांक मरण आयिल्ल्यान पत्रकारांक धोको फकत झुजाच्या वाठारांनी मर्यादीत ना हें दिसून येता.
पत्रकारांचेर हल्लो करपा फाटल्यान दंडमुक्ततायेची संस्कृताय आसा अशी शिटकावणी बेलांगर हांणी दिल्या. न्याय मेळूंक ना जाल्यार पत्रकारांचे खून करपी वाडिल्ल्याचेंय तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
