भांगरभूंय | प्रतिनिधी
जमनीच्या सगल्या धनयांंची एनओसी सक्तीची
पणजी : झाडां मारपा खातीरचे नेम आनीक खर करतना जमनीच्या सगल्या धनयांंची एनओसी घेवप आतां सक्तीचें जालां. गोंंय रानां संंवर्धन कायदो १९८४ च्या कलम ३५ खाला रानां खात्यान आदेश जारी केला.
झाडां मारपा खातीर कोणेंय अर्ज केलो जाल्यार संंबंंधीत अधिकार्यान जमिनीच्या धनयांंचीं नांवां तपासचीं पडटलीं. सगल्या धनयांंची एनओसी घेतल्या उपरांंतूच झाडां मारपा खातीरचो परवानो दिवपाची जापसालदारी अधिकार्यांची आसतली. जमीन एका परस चड जाणांंच्या नांवार आसल्यार एकल्याची एनओसी उपकारची ना. सगल्यांंची एनओसी घेतल्या उपरांंतूच परवानो दिवपाचे निर्देश जारी जाल्यात. तशेंच परवानो दिल्या उपरांंत ताची प्रत रानां खात्याच्या संंकेतथळाचेर लोड करची पडटली.
तशेंच परवान्यांची प्रत संंबंदीत पंंचायत, गट विकास अधिकारी कार्यालय, उपजिल्लोधिकारी कार्यालय, रानां अधिकारी कार्यालयाक धाडच्यो पडटल्यो. उप रानंा संंरक्षका १ हॅक्टर मेरेनच्या जमिनीचेर २ ते ५० झाडां मारपाक परवानो दिवपाचे अधिकार आसा. हाचे परस चड झाडां मारपाच्या परवान्यां खातीर सरकाराची मान्यताय घेवची पडटली. परवानो दिले उपरांंत परवानो धारकाक झाडां १० दिसांं उपरांंतूच मारपाक मेळटली, अशी अट घालची पडटली. हाका लागून कोणाकूय हरकत हाजीर करपाची संंद मेळटली.
झाडां मारपाक परवानो दिला त्या वाठाराचो नकासो अधिकार्याक गती शक्ती पोर्टलाचेर घालचो पडटलो. कायद्याच्या कलम १० प्रमाण परवानो दिल्यार परत झाडां (वनीकरण) लावपाची अट आसतली. झाडां लायलीं ना जाल्यार सुरक्षा रक्कम जप्त करपाची आदली तजवीज आसतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
