भांगरभूंय | प्रतिनिधी
कांय सुकणीं 12 ते 15 वर्सांनी पडलीं नदरेक
पणजी: गोंयांतल्या सुकणीं मोगीं खातीर फाटलें वर्स खोशयेचें थारलें. 2025 वर्सा गोंयांत खूबश्या स्थलांतरीत सुकण्यांनी गोंयाक भेट दिली. हातूंतलीं कांय सुकणीं दुर्मीळ समजतात. कांय सुकणीं गोंयांत 12 ते 15 वर्सांनी परतून नदरेक पडलीं. हातूंत ब्लॅक बेलीड स्टॉर्म-पेट्रेल, डॉउरियन स्टार्लींग, ग्रेलॅग गुज, मालार्ड, डेझर्ट व्हीटियर, इसाबेललाइन व्हीटियर, कॉमन रिंग्ड प्लोव्हर आणि पॅलीड स्कॉप्स आऊल अश्या वेगळ्यावेगळ्या सुकण्यांचो आस्पाव आसा. गोवा बर्ड कॉन्सर्वेशन नेटवर्काचे (जीबीसीएन) डॉ. प्रणय बैद्य हांणी ही म्हायती दिली.
ब्लॅक बेलीड स्टॉर्म-पेट्रेल हें एक सामकें दुर्मीळ दर्या वेलें (पेलाजीक) सुकणें आसा. हाचे आदीं हें सुकणें गोंयांत जमनी कुशीक केन्नाच दिसूंक नाशिल्लें. सुशील कुमार हांकां गोंयांतल्या दर्यादेगांचेर हें सुकणें दिसलें. सुशील हे तारवटी आसात, आनी आपल्या बोटी वेल्यान प्रवास करतना तांकां हें सुकणें दिसलां. अथर्व कस्तुरीया हांकां करमळी तळ्यांत डॉउरियन स्टार्लिंग हें दुर्मीळ स्थलांतरीत सुकणें दिशिल्लें. हें सुकणें लेगीत खूबश्या वर्सांनी गोंयांत परतून नदरेक पडलें.
सांता क्रुझ हांगासरल्या पाणथळांत, खाजनांत खूबशीं स्थलांतरीत सुकणीं नदरेक पडटात. स्टीफन मेनेझेस हांकां ग्रेलॅग गूज हें दुर्मीळ स्थलांतरीत सुकणें दिसलें. ह्याच वाठारांत मंगिरीश धारवटकार हांकां 15 वर्सां परस चड काळा उपरांत गोंयांत मल्लार्ड सुकण्यांचो चोंबो नदरेक पडलो. तशेंच 2025 वर्सा गोंयांत डेझर्ट व्हीटियर, इसाबेललाइन व्हीटियर, कॉमन रिंग्ड प्लोव्हर आनी पॅलिड स्कॉप्स आऊल सारक्या दुर्मीळ स्थलांतरीतत प्रजातींची नोंद जाल्ल्याचें डॉ. बैद्य हांणी सांगलें.
गोंयांत दिसून येवपी सुकण्यांची संख्या सद्या 497 आसा. हाका लागून भारतीय उपखंडांत सांपडपी वट्ट सुकण्यां पैकीं आतां मेरेन सुमार 40 टक्के सुकणीं गोंयांत सांपडल्यांत. रोखडीच ही संख्या 500 मेरेन पावतली अशी आस्त आसा. गोंयांतल्या सुकण्यांची ही विविधताय कायम राखप गरजेची आशिल्ल्याचें डॉ. बैद्य हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
