भांगरभूंय | प्रतिनिधी
पणजी : पर्यटकां खातीर नंदनवन आशिल्ल्या गोंयांत कांय पर्यटक फक्त सोरो आनी पार्ट्यो करपा खातीर येतात. लागीं लागींच बार वा सोर्याचीं दुकानां आशिल्ल्यान गोंयांत सोरो सहज मेळटा, असो सर्वसादारण समज आसा.
15 लाख लोकसंख्या आशिल्ल्या ल्हानश्या राज्यांत वट्ट 14,102 सोरो मेळपाच्यो सुवातो आसात. हातूंत ठोक आनी किरकोळ बाटली बंद सोर्याच्या दुकानां सयत ग्लासांतल्यान पिवपाची वेवस्था आशिल्ल्या बार्रांचो आसपाव आसा. गोंयची लोकसंख्या 15 लाख धरली जाल्यार हें प्रमाण 107 लोकां फाटल्यान सोर्याचें एक बार्र अशें जाता.
2025 वर्साक निरोप दिवपा वांगडा नव्या वर्साच्या येवकारा खातीर गोंयांत व्हडा प्रमाणांत पर्यटक दाखल जाल्यात. वर्साच्या निमाण्या दिसा आयज सांजवेळा सुरू जाल्ल्यो पार्ट्यो फाल्यां सकाळ मेरेन चलतल्यो. मजे खातीर थळावे आनी चडशे पर्यटक हातांत ग्लास घेवनूच मध्यानरातीं बारा वरांचेर नव्या वर्साक येवकार दितले.
सोर्याचीं दुकानां आनी बार्रांचो आंकडो पळयल्यार नव्या वर्सा खातीरूच न्हय जाल्यार बाराय म्हयने गोंयांत सगल्याक सोरो उपलब्ध आसता. गोंयांत दिसान दीस अपघातांचें प्रमाण वाडत आसा. अपघातांक कारण थारपी खूबश्यां कारणां मदलें एक कारण सोरो पियेवन गाडी चलोवप हें आसा. सोर्याचीं दुकानां आनी बार्रांचो आंकडो पळयल्यार हुस्को करपा सारकीच स्थिती आसा.
बार्देस म्हालांत सगल्यांत चड म्हणल्यार सोर्याचीं 4722 दुकानां आसात. सत्तरींत सगल्यांत उणीं 264 दुकानां आसात. शार आनी दर्यादेग वाठार आशिल्ल्या म्हालांनी सोर्याच्या दुकानांचें प्रमाण चड आशिल्ल्याचें जाणवता.
म्हाल सोऱ्याचीं दुकानां/बार्र
सांगें – 381
मुरगांव – 781
केपें – 581
काणकोण – 548
साश्टी – 2591
फोंडें – 949
दिवचल – 454
पेडणें – 1170
तिसवाडी – 1661
सत्तरी – 264
बार्देस – 4722
वट्ट – 14102
ठोक विक्रीचीं बाटलीबंद दुकानां – 353
किरकोळ विक्रीचीं बाटलीबंद दुकानां – 4272
सोरो पियेंवपाचीं दुकानां (बार्र) – 9323
डिस्टीलरी/ ब्रुवरी/ वायनरी – 154
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
