भांगरभूंय | प्रतिनिधी
महाराष्ट्रांत म्हापालिकांच्या उमेदवारी अर्जां वयल्यान जो वाद जालो, ताची दखल सगल्याच खबरां चॅनलांनी घेतली. 29 म्हापालिकां खातीर थंय 15 जानेवारीक मतदान जाता. 16 वेर निकाल. वट्ट 2869 जागे आसात. हाचे पयलीं 246 नगर परिशदो आनी 42 नगर पंचायतीं खातीर मतदान जालां. राजकारणाची दिशा आनी दशेचेर ह्यो स्वराज्य संस्थांच्यो वेंचणुको उजवाड घालतात. राजकारण हे समाजसेवेचें माध्यम. निसुवार्थी मनान लोकांची सेवा करपाचें एक मळ. राजकी फुडारी हे राष्ट्रपुरुस…. अशें एका काळार मानताले. मात आतां तें उरूंक ना. राजकारणाक वेवसायाचें रुप आयलें काय लोकशाय गिरायक जाता. राजकारण सत्ते खातीर सुरू जालें काय सेवा ठप्प जाता. खरें म्हणल्यार, वेंचणुके परस, लोकांचो विस्वास जिखप हेंच राजकारणाचें यश, जिखता तो व्हडलो फुडारी न्हय, तर जो लोकां मदीं तिगता, तोच खरो फुडारी. अर्थांत आतां ही संकल्पना बदल्ल्या.
एखादो तरणाटो भायर पडलो काय घरचीं रडटात, तसोच प्रकार पुण्यां, छत्रपती संभाजीनगरांत काल पळोवंक मेळ्ळो. जंय निश्ठेक मोल ना, थंय ‘राडा’ हो अपरिहार्य थारता. हे वेंचणुकेंत राजकी पक्षांनी मतदारांक किंकोत करून आपणाक जाय तशी युतीय केल्या. सर्कशींत वाग आनी बोकडी एकेच थाळयेंत जेवतात, तो प्रयोग पसून फिको पडटलो. पुण्यांत दोनूय राष्ट्रवादी एकठांय जाल्यात, एके कडेन ठाकरे आनी काँग्रेसीची युती आसा. दुसरे कडेन शिंदे शिवसेना आनी भाजपा आमनेसामने आसात. नशीब भाजपा आनी काँग्रेसीची खंय युती ना. ह्या विचित्र युतींक मतदार कशे प्रतिसाद दितले, तें पळोवप मजेचें थारतलें. कांय कडेन उमेदवारांची वळेरी जाहीर करूंक ना, मात भलत्यांकूच एबी फाॅर्म दिल्यात, असो निश्ठावानांचो दावो. भाजप सत्तेर आसा म्हणटकच चडशे बंडखोर हे तांचेच. भोवतेक सगल्याक पक्षांनी बंडखोरी जाल्या. कांय बंडखोरांनी पक्षांतर करून तिकेट मेळयल्या. आमी 15- 20 वर्सां पक्ष वाडयलो, पूण काल पक्षांत आयिल्ल्यांक तिकेटी दिल्यो, पीएच्या भावाक, मंत्र्यान सोयऱ्याक उमेदवार केलो, दोन कोटी रुपया घेवन तिकेटी वाटल्यात, अशे आरोप जाल्यात. मंत्री, आमदारांच्यो गाडयो आडायल्यो, तिचेर शाय ओतली, पक्ष कचेरेक घेराव घालो, थोडे हामेर फोडून रडले, घुंवळ येवन पडले, एकल्यान तर पेत्रोल ओतून लासून घेवपाचो यत्न केलो, एकल्यान आत्महत्या करपाची धमकी दिल्या, थोड्यांनी अपक्ष म्हूण अर्ज भरला, एकली आमरण
उपासाक बसल्या. हाचे वयल्यान राजकारण खंयच्या पांवड्यार पावलां, तें स्पश्ट जाता.
तिकेट मेळूंक नाशिल्ले इतले फुर्योज वा निरशेल्या कित्याक? मतदारसंघाचे उदरगतीचो हुस्को, 15- 20 वर्सां पक्षाची सेवा करूनय तिकेट मेळूंक ना म्हूण जाल्लो अपमान काय अर्थीक लुकसाण जालें, अशें दिशिल्ल्यान आयिल्ली निरशेणी? बरें जे बंडखोरी करून अपक्ष रावल्यात, ते वेंचून आयल्यार आपल्या मूळ पक्षांतूच वतले वा तांकां तेंको दितले म्हणटात! पक्षांनीय इतल्या वर्सांच्या थळाव्या उमेदवारा बदला राज्य फुडाऱ्यांच्या सोयऱ्यांक, पयरूच पक्षांत आयिल्ल्यांक तिकेटी कश्यो दिल्यो? पुण्यां बंदखणींत आशिल्ल्या गुन्यांवकाराक आनी ताच्या घरांतल्यांक तिकेट मेळ्ळ्या. एके कडेन घरांतले तीग जाण आसात. म्हणटकच तिडक व्यक्त जातलीच. गोंयांत मात अन्याय जाल्यार कोण सहसा हुं की चूं करिनात. मोन्यानी कुशीक सरतात. त्याच पक्षांत रावतात, मतदानूय ताकाच करतात. हांकां निश्ठावान म्हणपाचें काय असहाय्य?
राजकारणांत भितर सरतना हात नितळ आसतात, भायर पडटना मन निवळ उरना, अशें म्हणटात. युती आसतकच कांय उमेदवारांचेर अन्याय हो जाताच, पूण ताचो असो उद्रेक जाल्लो पयलेच फावट दिसलो, तोय खबरां चॅनलांचेर. हें च्यावेच्या कपांतलें वादळ काय त्सुनामी तें 16 तारखेक कळटलें!
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
