भांगरभूंय | प्रतिनिधी
मुख्यमंत्री : स्वतंत्र अधिसुचोवणी जारी
कुशावती न्हंयेदेगे वयले संस्कृती वयल्यान नांव
सध्या द. गों. उपजिल्होधिकाऱ्या कडेन ताबो
भांगरभूंय । प्रतिनिधी
पणजी : गोंयांत उत्तर आनी दक्षीण गोंया उपरांत कुशावती हो तिसरो जिल्हो स्थापन जावन ताची अधिसुचोवणी जारी जाल्या. तिसऱ्या जिल्ह्या खातीर जिल्होधिकारी आनी तीन अतिरिक्त जिल्होधिकारी आसतले. हे विशींची स्वतंत्र अधिसुचोवणी जारी जाल्या. कार्यालयां तशेंच हेर यंत्रणा स्थापन जाय मेरेन सध्या तरी दक्षीण गोंय जिल्होधिकाऱ्यां कडेनूच तिसऱ्या जिल्ह्याचो ताबो आसतलो, अशें मुख्यमंत्री डॉ. प्रमोद सावंत हांणी स्पश्ट केलां.
अधिसुचोवणेंत तिसऱ्या जिल्ह्यांत येवपी म्हाल तशेंच गांवांचो आस्पाव आसा. सर्वपक्षीय बसकेंत चर्चा जाल्या उपरांत मंगळारा सरकारान तिसऱ्या जिल्ह्याक मान्यताय दिली. ह्या जिल्ह्याचें नांव कुशावती आसतले, अशें आयज मुख्यमंत्री डॉ. प्रमोद सावंत हांणी जाहीर केलें. तिसऱ्या जिल्ह्यांत आशिल्ले काणकोण, केपें, सांगें आनी धारबांदोडें ह्या चारूय म्हालांतल्यान कुशावती न्हंय व्हावता. चारूय म्हालांची संस्कृती कुशावती न्हंयचेर आदारीत आशिल्ल्यान तिसऱ्या जिल्ह्याक कुशावती हें नांव दिवपाचो निर्णय जालो, अशें मुख्यमंत्री डॉ. प्रमोद सावंत हांणी सांगलें.
तिसऱ्या जिल्ह्याचें मुख्यालय केप्यां आसतलें. जिल्होधिकारी तशेंच हेर कार्यालयां आनी अधिकाऱ्यांची वेवस्था जावपाक थोडो वेळ लागतलो. केप्यां पुराय वेळ कार्यालयां स्थापन जाय मेरेन दक्षीण गोंय जिल्होधिकाऱ्यां कडेन जिल्होधिकाऱ्यांचो ताबो आसतलो, अशें मुख्यमंत्र्यांनी सांगलें.
काणकोण, धारबांदोडें सावन बशींची वेवस्था
काणकोण तशेंच धारबांदोडें सावन केप्यां येवपा खातीर थेट बशींची वेवस्था आसतली. हाका लागून काणकोण वा धारबांदोडेंच्या लोकांक केप्यां येवपा खातीर बशी बदलच्यो पडच्यो नात, अशें मुख्यमंत्री डॉ. प्रमोद सावंत हांणी सांगलें.
तिसरी जिल्हो पंचायत जातली
तिसऱ्या जिल्ह्या खातीर उत्तर, दक्षीणे प्रमाण स्वतंत्र जिल्हो पंचायत जातली. हे जिल्हो पंचायती खातीर स्वतंत्र अध्यक्ष, उपाध्यक्ष आसतलो, अशेंय मुख्यमंत्र्यांनी सांगलें.
कुशावती जिल्ह्या खातीर अधिकाऱ्यांची नेमणूक
कुशावती ह्या तिसऱ्या जिल्ह्या खातीर जिल्होधिकाऱ्या सयत हेर अधिकाऱ्यांची नेमणूक सरकारान केल्या.
जिल्होधिकारी- एग्ना क्लेटस (आयएएस), पुलीस अधिक्षक – टिकमसिंग वर्मा (आयपीएस), उपवनसंरक्षक : संतोष कुमार रेड्डी (आयएफएस). ते भायर दीपक वायंगणकार (फॉरेस्ट सेटलमेंट अधिकारी), डॉ. मेडोरा डिकोस्टा (प्रकल्प अधिकारी, डीआरडीए), वेल्टन तेलीस, प्रजीत चोडणकार (उपजिल्होधिकारी), प्रसीध नायक (उपसंचालक, पंचायत), अवेलिना डिसा परेरा (उपजिल्होधिकारी), रोहन लोलयेंकार (उपजिल्होधिकारी), गीता गांवकार (उपसंचालक, आदिवासी कल्याण), श्रीनेत कोठावले (अतिरिक्त जिल्होधिकारी), रमेश गांवकार (अतिरिक्त जिल्होधिकारी), विशाल कुंडयकार (अतिरिक्त जिल्होधिकारी), मॅनुएल बारेटो (अतिरिक्त पंचायत संचालक), दीपाली नायक (प्रकल्प संचालक, डीआरडीए), शर्मिला गांवकार (उपजिल्होधिकारी – भूसंपादन).
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
