नव्या वर्साक येवकारतना….

भांगरभूंय | प्रतिनिधी

येवपी नव्या वर्सा काळजांतलें कॅलेंडर सुखद आनी गोड यादींनी भरूं. देशांत आनी संवसारांत शांततायेचें वातावरण आसूं.

घड्याळीचे काटे तांकां दिल्ले जापसालदारके प्रमाण,आपलें काम परिपूर्णपणान करतात. मनीस फुडाराचो विचार करित नेटान धांवता आनी ताकाच लागून नव्या वर्साच्या वेळार घड्याळाचे काटे वेगान धांवतात अशें तांका दिसता. वेगान चलपी जिणेक लागून 24 वरांचे दीस वचून, 30 दिसांचो म्हयनो केन्ना सोंपता तें केन्नाच कळना. म्हणटा म्हणटा 12 म्हयन्यांचें वर्स काबार जाता, पूण फाटल्या वर्सातल्यो कांय कोडू- गोड यादीं मनांत उरतात. त्यो काळजाक आकुपिकूळ करतात. त्यो घेवन आमी फुडल्या वर्सांत मुखार सरतात. डिसेंबराचो निमाणो म्हयनो कुलकुल्याची थंडाय, हवामान सामकें थंड. सगळे कडेन उमेद, सुटयेचो मूड आसता. ह्या कारणान गोंयच्यो दर्यावेळो भोवंडेकारांनी गजबजतात. पिकनिक स्पॉट, हॉटेल, रेस्टॉरंट, पब, हाऊसफुल. ह्या काळांत पयशांचो हुंवार आयिल्लो दिसता. हॉटेल, रेस्टॉरंट, बार मालक खूब खोशी जातात, थोडयाच उतरांनी अर्थवेवस्थेक व्हडली उर्बा मेळटा, आनी पर्यटन आनी हॉटेलकार हांचो वेवसाय पुरायपणान फुलता.

इंग्लीश वर्स 2025 वतलें, म्हणल्यार  2025 वर्स 31 डिसेंबराक मध्यान रातीं निवृत्त जालें. 2026 वर्स कशें आसतलें तें आतांच सांगप अशक्य. येवपी वर्स  बरेंच आसतलें अशी आस्त बाळगूया आनी सदचे भशेन नव्या वर्साक येवकारुया. वर्सावळी प्रमाण 1 जानेराक कांय जाण नवे निर्णय घेतात आनी काळा प्रमाण विसरतात. वर्साचो आंकडो बदलतलो, पूण संवय बदलची ना तो मेरेन सुदारणा घडची ना. सद्या इंग्लीश नव्या वर्साच्या येवपा विशीं जितली उमेद आसता तितली हिंदू नव्या वर्सा दिसा उमेद आसना. इंग्लीश नव्या वर्साची ही उमेद दर वर्सा वाडतूच आसा. भुरगेपणांत नव्या वर्साक येवकार दिवचो, ताचे येवप- वचप कळनाशिल्लें आनी त्या वेळार पार्टी हें उतर आमच्या वैयक्तीक शब्दकोशांत नाशिल्लें. पार्टी करपा विशीं कांयच खबर नाशिल्लें, आनी त्या वेळार खासा स्मार्ट फोना सारकी साधनांय नाशिल्लीं. कांय क्रिस्तांव भावांच्या घरा मुखार नखेत्रां सोडल्यार कसलीच रोशणाय वा सजावट अशें कितेंय पळयल्लें याद ना.

म्हज्या मतान, दरेका घरांत टीव्ही आयलो तेन्हा सावन सामान्य लोकांनी इंग्लीश नवें वर्स व्हड दबाज्यान मनोवपाक सुरवात जाल्या. पूण खरें जांचें नवें वर्स आसा तें मनोवपाच्या मळार फाटीं पडल्यात अशें चित्र निर्माण जालां. ब्रिटीश भारत सोडून वतना हांगा असंख्य अनुयायी सोडून गेले अशेंय दिसता. किदेंय जावं, संवसारभर नव्या वर्साक खोशयेन येवकार दितात तेन्ना ताकाय येवकार दिवपाक त्रास कसलो,  सगल्यांनी दुसऱ्याकुय कसलोच त्रास दिवचो न्हय. परब मनोवप दरेका धर्मीयाचो हक्क हाची जतनाय घेवची. संवसारभर नव्या वर्साची परब मनयतात. 31 डिसेंबर, 2019 च्या राती आवाज आनी वायु प्रदुशणा विशीं पर्यावरणवादी चड बोवाळ करिनात. प्रसार माध्यमां लेगीत ओगी रावतात, कितेंय आसूं. नव्या इंग्लीश वर्साची सुरवात 1 जानेवारी सावन जाली. सुरवेक सवयी प्रमाण वर्स बरयतनाकांय गोंदळ जातलो. 2026 वर्सा बदला 2025  बरयतले, पूण 2026 वर्साची संवय जातकच ती सोंपतली. वण्टीं वयलें सकयल देंवपाची वाट पळयतल्या कलेंडरा भशेन मनशालें मन. तातूंत फाटल्या वर्साच्यो सुखी आनी दुख्खाच्यो तारखो अचूकपणान नोंद आसतात.

कांय गजाली खूब गोड यादींनी भरिल्यो जाल्यार कांय खूब कोडू. दुकां व्हावंयतात, जाल्यार कांय  खोशेयेचीं दुकां हाडटात. जशीं जशीं वर्सां वतात तशें “मन” सगळ्या आंगांनी परिपक्व जाता. तें कितें सांठोवचें आनी भायर वडवचे  हातूंत भेद करपाचो सतत यत्न करता. नव्या वर्सा भितर सरतना  सुख-दुखाचो खेळ खेळपाक सगळेच वाट पळयतात. मनीस आयुश्यभर अपेक्षांचो वजें घेवन भोंवता. दर वर्सा ताच्यो अपेक्षा बदलतात आनी वाडटात. कांय एकाच वर्सा पुराय जातात, जाल्यार कांय भंगतात. कांय अपेक्षा नव्या वर्सा पुराय जातात, दर वर्सा कम्फर्ट झोन वाडटा आनी मानसीक त्रासुय. पूण कांय आडवाद सोडल्यार खांद्यार आशिल्ल्या अपेक्षांचो भार उणो करपा खातीर कोणूच आदार करिना. कांय जाणांच्या माथ्यार रिणाचें चेंपण आसता, म्हणल्यार सतत ताण. पयलीं दूरदर्शन मध्यान रात मेरेन  मनरिजवणेचे कार्यावळ दाखयतालें, देखून मध्यान रात मेरेन जागत रावूं येताले, पूण सध्या मोबायल चोवीस वरां हातांतलें मनरिजवणेंचें साधन जालां देखून दूरदर्शना वयली नव्या वर्साची कार्यावळ पुरायपणान वाजेवणी थारल्या.

दर नव्या वर्सा कोणाच्या वाट्यांत कितें येतलें तें कोणाक खबर ना. केन्ना- केन्ना मुखार वतना दुख्खाचे दोंगर हुंपचे पडटात तेन्ना ते केन्नाच सोंपचे नात अशें दिसता. अशा वेळार  मनीस फकत फाटलें वर्स खूब वायट आशिल्लें अशें म्हणटा. कॅलेंडर रद्दीत वडवोपाक मेळत, पूण मनांतलें कॅलेंडर कायम स्वरूपी. खंयचे नोंदींक कितें म्हत्व दिवचें तें थारावप ताचेर आशिल्ल्यान तुमी एकलेच तें ​​चाळपाक शकतात. तरी केन्ना तुमचें मन हलकें करपा खातीर तुमच्या विस्वासपात्र इश्टांक तें चाळपाक दिवचें. 

गिरेस्त आनी हेर लोक आपल्या सामर्थ्या प्रमाण 31 डिसेंबराची परब मनयतात. तांचे खातीर ही रात एक कार्यावळ. पूण गरीबांक दरेक रात एक भयानक, काळखी रात. कारण फाल्यां विशीं तांकां सतत हुस्को आसता. येवपी नव्या वर्सा काळजांतलें कॅलेंडर सुखद आनी गोड यादींनी भरूं. देशांत आनी संवसारांत शांततायेचें वातावरण आसूं. शेतकारांक बरी पिकावळ मेळूं, भारतांतलें जातीवादाचें बुरशें राजकारण सोंपूं…. भ्रश्ट आनी वायट विचारांच्या धोंगी लोकांचो नाश जावं, ही आमची देवा कडेन प्रार्थना. वर्सा वळी प्रमाण मध्यान रातीं इंग्लीश वर्स 2025 सोंपलें  आनी नव्या 2026 वर्साक संवसारभर येवकार दिलो.  2026 ह्या इंग्लीश नव्या वर्साक संवसारीक संवकळीचें उतरानी “Happy New year” म्हणून येवकारुया.

————————-

सुदिन वि. कुर्डीकार