भांगरभूंय | प्रतिनिधी
सध्या तरी दक्षीण गोंय जिल्हाधिकार्यां कडेनूच ताबो, काणकोण, धारबांदोडेंच्यान थेट बशी
पणजी : राज्यांत उत्तर आनी दक्षीण गोंयां उपरांत कुशावती हो तिसरो जिल्लो स्थापन जावन ताची अधिसुचोवणी जारी जाल्या. तिसर्या जिल्ह्या खातीर जिल्लोधिकारी आनी तीन अतिरिक्त जिल्लोधिकारी आसतले. हे विशींची स्वतंत्र अधिसुचोवणी जारी जाल्या. कार्यालयां तशेंच हेर यंत्रणां स्थापन जाय मेरेन सध्या तरी दक्षीण गोंय जिल्लोधिकार्यांकडेनूच तिसर्या जिल्ह्याचो ताबो आसतलो, अशें मुख्यमंत्री डॉ. प्रमोद सावंत हांणी स्पश्ट केलां.
अधिसुचोवणेंत तिसर्या जिल्ह्यांत येवपी म्हाल तशेंच गांवांचो आस्पाव आसा. सर्वपक्षी बसकेंत चर्चा जाले उपरांत मंगळारा सरकारान तिसर्या जिल्ह्याक मान्यताय दिली. ह्या जिल्ह्याचें नांव कुशावती आसतलें, अशें आयज डॉ. सावंत हांणी जाहीर केलें.
तिसर्या जिल्ह्यान आशिल्ले काणकोण, केपें, सांगें आनी धारबांदोड्यां ह्या चारूय म्हालांतल्यान कुशावती न्हंय व्हांवता. चारूय म्हालांची संस्कृती कुशावती न्हंयेचेर आधारीत आशिल्ल्यान तिसर्या जिल्ह्याक कुशावती हें नांव दिवपाचो निर्णय जालो, अशें तांणी सांगलें.
तिसर्या जिल्ह्याचें मुख्यालय केप्यां आसतलें. जिल्लोधिकारी तशेंच हेर कार्यालयां आनी अधिकार्यांची वेवस्था जावपाक थोडो वेळ लागतलो. केप्यां पुराय वेळ कार्यालयां स्थापन जाय मेरेन दक्षीण गोंय जिल्लोधिकार्यां कडेन ताबो आसतलो, अशें मुख्यमंत्र्यांनी सांगलें.
बशींची वेवस्था
काणकोण तशेंच धारबांदोड्यां सावन केप्यां येवपा खातीर थेट बशींची वेवस्था आसतली. हाका लागून काणकोण वा धारबांदोडेंच्या लोकांक केप्यां येवपा खातीर बशी बदलच्यो पडच्यो नात, अशें तांणी सांगलें.
तिसरी जिल्हो पंचायत जातली
तिसर्या जिल्ह्या खातीर उत्तर, दक्षिणे प्रमाण स्वतंत्र जिल्हो पंचायत जातली. तिचे खातीर स्वतंत्र अध्यक्ष, उपाध्यक्ष आसतलो, अशेंय मुख्यमंत्र्यांनी सांगलें.
कुशावती जिल्ह्यांतले अधिसुचीत गांव
केपें : आमोणा, अवेडें, असोल्डा, अडणें, आंबावली, बाळ्ळी, बेंदोर्डे, बार्से, चैफी, कोठंबी, काकोडा, कावरें, कोर्डे, कोर्ला, काजूर, कुडचडें, कुस्मणे, देवो, फातर्पा, गोकुर्डें, होडार, मोरपिर्ला, मलकपण, मळकर्णे, मायणा, मंगल, नाकेरी, नागवें, पाडी, पिर्ला, किटला, खेडें, केपें, किसकोण, शिरवय, सुळकर्णा, तिळोय, उंदोर्णा, शेल्डें, शेळवण, झीक शेळवण, झानोडे
सांगें : अंतोरी, भाटी, भोमा, काळे, कोळंब, कोंप्रोय, कोरगिणी, कश्टी, कोटार्ली, कुंबारी, कुर्टी, डोंगोर, डोंगुर्ली, दुदाळ, कुर्पे, मावळींगे, मुगुळी, नायकिणी, नेतुर्ली, नुंदे, ओशेल, पाटये, पोर्तीम, पोट्रे, रिवण, रूंब्रे, साळावली, सांगें, सांतान, सावर्डे, सिगोणे, तुडाळ, उगे, वेर्ले, विचुंद्रे, वीलीयन, शेळपें
धारबांदोड्यां: अग्लोटे, बांदोळी, कामरकणीक, करंझोळ, कोडली, कुळें, कार्मोण्यां, धारबांदोडा, मयसाळ, मोलें, पिळयें, साकोर्डा, सांगोड, शिगांव, सोनावली, सुर्ला
काणकोण : आगोंदा, अंगदिव, काणकोण, चावडी, खोला, खोतिगांव, गावडोंगरी, लोलये, नगर्से – पाळोले, पैंगीण
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
