भांगरभूंय | प्रतिनिधी
किरकोळ, ठोक, बार्रां मेळून सोर्याच्यो वट्ट १४,१०२ सुवातो
पणजी : पर्यटकां खातीर नंदनवन आशिल्ल्या गोंयांत कांय पर्यटक फकत सोरो आनी पार्ट्यो करपा खातीर येतात. लागीं लागींच बार वा सोर्याचीं दुकानां आशिल्ल्यान गोंयांत सोरो सहज मेळटा, असो सर्वसाधारण समज आसा. १५ लाख लोकसंख्या आशिल्ल्या ल्हानशा राज्यांत वट्ट १४,१०२ सोरो मेळपाच्यो सुवातो आसात. हातूंत ठोक आनी किरकोळ बाटली बंद सोर्याच्या दुकानां सयत ग्लासांतल्यान पिवपाची वेवस्था आशिल्ल्या बार्रांचो आसपाव आसा. राज्याची लोकसंख्या १५ लाख धरली जाल्यार हें प्रमाण १०७ लोकां फाटल्यान सोर्याचें एक बार्र अशें जाता.
२०२५ वर्साक निरोप दिवपा वांगडा नव्या वर्साच्या येवकारा खातीर गोंयांत व्हडा प्रमाणांत पर्यटक दाखल जाल्यात. वर्साच्या निमाण्या दिसा आयज सांजवेळा सुरू जाल्ल्यो पार्ट्यो फाल्यां सकाळ जाय मेरेन चलतल्यो. मजे खातीर थळावे आनी चडशे पर्यटक हातांत ग्लास घेवनूच मध्यानरातीं बारा वरांचेर नव्या वर्साक येवकार दितले.
सोर्याचीं दुकानां आनी बार्रांचो आंकडो पळयल्यार नव्या वर्सा खातीरूच न्हय तर बाराय म्हयने गोंयांत सगल्याक सोरो उपलब्ध आसता.
राज्यांत दिसान दीस अपघातांचें प्रमाण वाडत आसा. अपघातांक कारण थारपी खुबश्यां कारणां मदलें एक कारण सोरो पियेवन गाडी चलोवप हें आसा. सोर्याचीं दुकानां आनी बार्रांचो आंकडो पळयल्यार हुस्को करपा सारकीच स्थिती आसा.
बार्देस म्हालांत सगल्यांत चड म्हणल्यार सोर्याचीं ४७२२ दुकानां आसात. सत्तरींत सगल्यांत उणीं २६४ दुकानां आसात. शार आनी दर्यादेग वाठार आशिल्ल्या म्हालांनी सोर्याच्या दुकानांचें प्रमाण चड आशिल्ल्याचें जाणवता.
तालुको – सोऱ्याची दुकानां/बार
सांगें – ३८१
मुरगांव – ७८१
केपें – ५८१
काणकोण – ५४८
सासश्टी – २५९१
फोंडें – ९४९
दिवचल – ४५४
पेडणें – ११७०
तिसवाडी – १६६१
सत्तरी – २६४
बार्देस – ४७२२
वट्ट – १४,१०२
ठोक विक्रेचीं दुकानां – ३५३
किरकोळ विक्रेचीं दुकानां – ४२७२
सोरो पियेवपाचीं बार्रां – ९३२३
डिस्टीलरी/ब्रिवरीज/वायनरी – १५४
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
