भांगरभूंय | प्रतिनिधी
गोंयच्यान 1600 परस चड खेळगडे वांटो घेतले: रमेश तवडकार
पणजीः खेळां खातें, खेळां प्राधिकरण आनी आदर्श युवा संघान 9 ते 11 जानेवारी मेरेन काणकोण- पैंगीण हांगाच्या आदर्श युवा संघा वतीन आमोण्यां धावो आदिवासी खेळां महोत्सव आयोजीत केला. ह्या महोत्सवांत गोंयच्यान 1600 परस चड खेळगडे वांटो घेतले अशी म्हायती खेळां मंत्री रमेश तवडकार हांणी दिली. मंगळारा पणजेंत जाल्ले पत्रकार परिशदेंत ते उलयताले. ह्या वेळार अजय गावडे आनी विवेक पवार हाजीर आशिल्ले.
तवडकार हांणी सांगलें, गोंयांत खेळां संस्कृती वाडोवप, आदिवासी खेळगड्यांक सोदून तांका संद दिवपा खातीर महोत्सवाचें आयोजन केलां.
महोत्सवांत टेनीस क्रिकेट, व्हॉलिबॉल, अॅथलेटिक्स हांचे सयत परंपरीक खेळां प्रकारांत सर्ती जातल्यो. हातूंत कबड्डी, खो खो, लगोरी, लंगडी, दोरी ओडप अशे खेळां प्रकार आसतले. सर्तींत 12 म्हालांतले 1648 खेळगडे जाल्यार 240 खेळां अधिकारी वांटेकार जातले.
तांणी म्हणलें, ह्यो सर्ती बायलांच्या आनी दादल्यांच्या गटां मदीं जातल्यो. कबड्डी, खो-खो, टॅनीस क्रिकेट, व्हॉलिबॉल ह्या सर्तींनी पयलें इनाम 25 हजार, दुसरें 20 हजार जाल्यार तिसरें 15 हजार रुपया आनी करंड अशें आसतलें. म्हाल पांवड्यार पंगडाची निवड 28 डिसेंबराक दरेक म्हालांत जातली. तशेंच महोत्सवा वेळार अखील भारतीय मॅरेथॉन सर्तीचें आयोजन लेगीत केलां. हातूंत सुमार एक हजार स्पर्धक वांटेकार जातले.
परंपरीक खेळांक प्रोत्साहन
गोंयांतल्या परंपरीक खेळांक प्रोत्साहन दिवपा खातीर खेळां खातें यत्न करीत आसा. हातूंतलोच एक वांटो म्हूण लगोरी, कोंयडेबाल हांच्यो संघटणा तयार केल्यात. तशेंच हेर परंपरीक खेळां प्रकारांच्यो संघटणा करपाचें काम सुरू आसा अशें खेळां मंत्री रमेश तवडकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
