चोरां पसून धर्मीक थळां सुरक्षीत नात अशा सुवातांचेर बसयतले हायमास्ट

भांगरभूंय | प्रतिनिधी

युरी आलेमांवः आंबावले श्रीसतीदेवी देवळा कुशीक बसयलो हायमास्ट

मडगांवः धर्मीक थळां लेगीत दरोडेखोर आनी चोरां पसून सुरक्षीत नात अशें सांगून, कुंकळ्ळीचे आमदार युरी आलेमांव हांणी अशा सुवातांचेर उजवाड घालपा खातीर आपणें हायमास्ट बसोवपाक प्राधान्य दिलां अशें सांगलें.

कुंकळ्ळी मतदारसंघांतल्या आंबावली हांगाच्या श्रीसतीदेवी देवळा लागसार हायमास्टाचें उक्तावण करतना ते उलयताले.

गोंयांत अशा सुवातांचेर चोरयेच्यो जायत्यो घडणुको घडल्यात आनी अश्यो घडणुको आडावपा खातीर सतर्क रावपाची गरज आसा अशें आलेमांव हांणी सांगलें.

हांगाच्या देवळांनी प्रार्थना आनी धर्मीक कार्यावळीं खातीर लोक एकठांय येतात, देखून योग्य उजवाड घालप खूब गरजेचें आशिल्लें. ह्या प्रकल्पाक तेंको दिल्ले खातीर हांव सगल्यांचे उपकार मानतां, अशें तांणी सांगलें.

फाटल्या दोन म्हयन्यांत सुमार 13 सुवातांनी हायमास्ट बसयल्यात, अशें आलेमांव हांणी सांगलें.

आनीक सुमार 18 सुवातां खातीर विवीध सुवातांतल्यान प्रस्ताव आयल्यात. ते प्रक्रियेंत आसात आनी ते बेगिनूच बसयतले असो म्हाका विस्वास आसा अशें अलेमांव हांणी मुखार उलयतना सांगलें.

अशा प्रकल्पांक तेंको दिल्ले खातीर तांणी थळाव्यांचे उपकार मानले.

आंबावले वांठारांत लोककल्याणाचीं कामां सुरू आसात आनी आपल्या कार्यालया वरवीं फुडल्या प्रस्तावांचेर काम सुरू आसा अशें आलेमांव हांणी सांगलें.

लोकांनी गांवा खातीर ज्यो ज्यो मागण्यो केल्यात, त्यो आमी पुराय करपाचो यत्न केला. तुमच्या तेंक्या बगर तें शक्य जायना. ते खातीर तुमचो तेंको सदांच जाय आनी ह्याच माध्यमांतल्यान उदरगत सादप गरजेचें अशें तांणी मुखार उलयतना सांगलें.

आदले पंच निलेश नायक, सत्यवान काकोडकार, मिलाग्रेस फर्नांडीस, यशवंत गांवकार, आर्मीन पिरीस आनी हेर मानेस्त ह्या वेळार हाजीर आशिल्ले.