भांगरभूंय | प्रतिनिधी
चिंतन – 93
तुकाराम महाराज म्हणटात —
“पाठेळ करितां न साहावे वारा।
साहेलिया ढोरा गोणी चाले ॥”
ल्हान प्राणी आसतना ताका सादें वारें लेगीत नाका दिसता. पूण वाडत वता तसो तो वजें घेता, अणभव घेता आनी त्या अणभवांक लागून ताची तांक वाडटा. शेवटाक तोच प्राणी वाडटा आनी फाटीर साकांचीं वजीं आसलें तरी तो सहज चलूंक शकता.
ही ओळ फकत जनावरांचें वर्णन न्हय, ती आमच्या दरेका जिविताची काणी.
तुमकां याद आसा तुमी पयलेच खेपे शाळेंत फेल जाल्ले तेन्ना? ल्हान परिक्षेचो निकाल पळोवन मन कोसळटालें. उदास दिसतालें. एखादो शिक्षक आड्डलो, इश्टान सांगात सोडलो काय दिसतालें संवसारुच सोंपलो. तेंच तें “वारें” जें सोंसनाशिल्लें.
पूण मागीर जिवीत फुडें सरलें. कॉलेज, नोकरी, संवसारीक जिवीत- आनी आतां? जापसालदारक्यो, अपेक्षा आनी संघर्श हांचीं “वजीं” आमी दर दिसा फाटी वयल्यान व्हरतात…. आनी चलत रावतात. किद्याक? कारण आमचे कुडींक “साहेलिया ढोरां” चें बळगें आयलां.
वजन उखलप हें फकत जिमांत घडटा अशें न्हय — जिवितांतय घडटा. संवसारीक नामनेची वजन उखलपी मिराबाई चानू हिची काणी पळोवया.
ल्हान गांवांतली ती चली. गरीब घर, साधनां उणीं. सुरवेक सादें 10 किल वजन लेगीत तिका जड दिसतालें. पूण दिसपट्ट्या सरावाक लागून, अपेसांक तोंड दिवन आनी परत परत उबी रावून ती इतली तयार जाली की निमाणें ऑलिंपिकांत रुप्यां पदक मेळयलें.
तिच्या दोळ्यांत खोशेचीं दुकां आशिल्लीं – कारण ती फकत लोखण उखलनाशिल्ली, तर, स्वताच्या जिविताचें वजें उखलताली.
तेच प्रमाण सातपुडा दोंगर वाठारांतलो हनुमंत काटके — महाराष्ट्रांतलो एक ल्हानसो वजन उखलपी. ताचे कडेन उपकरणां नाशिल्लीं, प्रोटिन शेक नाशिल्ले. पूण गांवांतले फातर, बाल्दी आनी रेंव घेवन तो व्यायाम करपाक लागलो. आयज तो राज्य पांवड्यावेल्या सर्तींनी भांगरा पदकां जिखता.
तो म्हणटा, “पयलीं हात थरथरताले. पूण एक दीस दर दिसा उखलता उखलता आंगांत बळगे आयलें. मागीर म्हाका दिसलें — हांव म्हजो ‘ढोरा’ जालां.”
सहनशक्ती म्हणल्यार फकत तिगून रावप न्हय. अडचणींक हांसून तोंड दिवपाची ती गजाल.
“पाठेळ करितां न साहावे वारा”- जेन्ना आमी कितें तरी नवें शिकपाचो यत्न करतात तेन्ना एक ल्हानशें अपेस लेगीत आमकां हालोवन उडयता.
“साहेलिया ढोरा गोणी चाले” — पूण एकदां अणभव आनी यत्नांतल्यान आमी बळिश्ट जाले उपरांत जिणेचें वजें पिसा इतलें हलकें दिसता.
– ह भ प देवदत्त दिगंबर परुळेकर
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
