भांगरभूंय | प्रतिनिधी
पणजी : खेळां खातें, खेळां प्राधिकरण आनी आदर्श युवा संघा वतीन आदर्श ग्राम अमोणें, पैंगीण, काणकोण हांगा ९ ते ११ जानेवारी मजगतीं ९ व्या आदिवासी खेळां महोत्सवाचें आयोजन केलां. महोत्सवांत राज्यभरच्या १६०० परस चड खेळगडे वाटेकार जावपाचे आशिल्ल्याची म्हायती खेळां मंत्री रमेश तवडकार हांणी दिली. मंगळारा पणजे जाल्ले पत्रकार परिशदेंत ते उलयताले. ह्या वेळार अजय गावडे, विवेक पवार हाजीर आशिल्ले.
तवडकार हांणी मुखार सांगलें, राज्यांत खेळां संस्कृती वाडोवप, आदिवासी खेळगड्यांक सोदून तांकां संद दिवपा खातीर महोत्सवाचें आयोजन करतात.
महोत्सवांत टेनिस क्रिकेट, व्हॉलीबॉल, एथलेटिक्स हांचे सयत परंपरीक खेळां प्रकारांत सर्त जातली. हातूंत कबड्डी, खो खो, लगोरी, लंगडी, दोरी ओडप अशे खेळांचे प्रकार आसात. सर्तींत १२ म्हालांतल्यान १६४८ खेळगडे जाल्यार २४० खेळां अधिकारी वाटेकार जातले.
ही सर्त बायल आनी दादलो गटा मदीं जातली. कबड्डी, खो-खो, टॅनीस क्रिकेट, व्हॉलीबॉल ह्या सर्तींनी पयलें इनाम २५ हजार, दुसरें २० हजार जाल्यार तिसरें इनाम १५ हजार रुपया आनी ट्रॉफी अशें आसतलें. म्हाल पांवड्यार संघाची निवड २८ डिसेंबराक दरेका म्हालांत घेतले. तशेंच महोत्सवा मजगतीं अखील भारतीय मॅरेथॉन सर्तीचें आयोजनूय केलां. हातूंत सुमार १ हजार सर्तक वाटेकार जातले, अशें तांणी सांगलें.
परंपरीक खेळांक उर्बा
राज्यांतल्या परंपरीक खेळांक उर्बा दिवपा खातीर खेळां खातें यत्न करता.हातुंतलोच एक भाग म्हणून लगोरी, विटी दांडू हांच्यो संघटणा तयार केल्यात. तशेंच हेर परंपरीक खेळां प्रकारांच्यो संघटना करपाचें काम सुरू आसा, अशें तवडकार हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
