दक्षीण गोंय जिल्लो पंचायत वेंचणूक: विरोधकांतल्या धा मदल्या एकल्यान केलें भाजपाक मतदान

भांगरभूंय | प्रतिनिधी

मडगांव : दक्षीण गोंय जिल्लो पंचायत वेंचणुकेंत काँग्रेसीन भाजपा आड उमेदवार उबो केल्लो. काँग्रेसीक ९ जाल्यार भाजपाक १६ मतां मेळ्ळीं. मतदानावेळार विरोधकांतल्या धा मदल्या एकल्यान भाजपाक मतदान केलें. हाका लागून विरोधकां मदीं फूट आशिल्ल्याचें दिसून आयलें. उपरांत काँग्रेस, गोवा फॉरवर्ड आनी आपा कडल्यान एकामेकां कडेन बोट दाखोवप सुरू जालां.
भाजपा वतीन सिद्धार्थ गांवस देसाय जाल्यार काँग्रेसी वतीन लुईझा रॉड्रिग्ज हांणी अर्ज भरिल्ले. उपाध्यक्षपदा खातीर भाजपा वतीन अंजली अर्जुन वेळीप हांणी आनी गोवा फॉरवर्ड वतीन इनासिना पिंटो हांणी अर्ज सादर केल्ले.

जिल्लो पंचायतींतले वेंचणुकेंत दक्षीण गोंयांत २५ मदल्यो ११ सुवातो भाजपान जिखल्यो. तशेंच मगोचे तीन आनी अपक्ष अशें वट्ट १५ संख्याबळ भाजप आनी युतींतल्या पक्षांचें आसा. जाल्यार ह्या वेळार काँग्रेसीन नेट लावन आठ सुवातो जिखल्यो. हातुंतल्यो सात सुवातो सासश्टी म्हालांतल्यो आसात. जाल्यार एक सुवाते केपेच्या खोला हांगची. तशेंच युतींतल्या गोवा फॉरवर्ड पक्षान एक सुवात जिखिल्ल्यान काँग्रेस आनी गोवा फॉरवर्ड हांणी दक्षीण गोंयांत णव सुवातांचेर जैत मेळटलें. तशेंच आपाचो एक वांगडी कोलव्यां वेंचून आयला. हाका लागून गोवा फॉरवर्ड, कॉंग्रेस आनी आप अशे १० वांगडी विरोधकां कडेन आशिल्ले.
अध्यक्षपदा खातीर जाल्ले वेंचणुके वेळार मंगळारा दक्षीण गोंयांत सेगीत दुसरे फावट जिल्लो पंचायत वेंचणूक जिखिल्ले शेल्डेंचे सिद्धार्थ गांवस देसाय हांकां अध्यक्ष पदा खातीर आनी बार्सेची वांगडी अंजली वेळीप हांकां उपाध्यक्ष पदा खातीर २५ मदलीं १६ मतां मेळ्ळीं. जाल्यार काँग्रेसीची लुईझा रॉड्रिग्ज आनी आपची इनासिना पिंटो हांकां णव मतां मेळ्ळीं. मतदानावेळार विरोधकांचीं धा मतां आसतना आनी भाजपचीं पंदरां मतां आसतना भाजपाक १६ मतां मेळ्ळीं. हाका लागून विरोधी पक्षांतल्या कोणेंतरी भाजपाक साथ दिल्ल्याचें स्पश्ट जालें. हाका लागून विरोधकां मदली फूट मुखार आयल्या. उपरांत काँग्रेसीचे दक्षीण गोवा जिल्लोध्यक्ष सावियो डिसिल्वा हांणी आम आदमी पक्षाचेर नेम धरतना भाजपची बी टीम कोण हें ह्या मतदानांतल्यान स्पश्ट जाल्ल्याची टिका केली.