भांगरभूंय | प्रतिनिधी
3 बायलां सयत 4 जाणांक मरण: 9 जाण गंभीर
मुंबय: मुंबयच्या भांडुप रेल्वे स्टेशना भायर सोमारा रातीं उसरां एके बसीन १३ जाणांक चिड्डीले. ह्या अपघातांत ३ बायलां सयत ४ जाणांक मरण आयलें. ९ जाण गंभीर जखमी जाले. मुंबय पुलिसांनी सांगलें, हो अपघात रातच्या ९:३५ वरांचेर बृहन्मुंबय इलेक्ट्रिक सप्लाय अँड ट्रान्सपोर्ट (बेस्ट)चे बसीक लागून जालो.
हे विशीं चड म्हायती प्रमाण, बेस्टची बस रिव्हर्स घेतना बसीवेलें नियंत्रण गेल्ल्यान रस्त्यार चलपी लोकांक बसीन धपको दिलो. अपघाता उपरांत बस चालकाक ताब्यांत घेतलो. घडणुके उपरांत ऍम्बुलन्स, मुंबय उजो पालोवपी दळ आनी बेस्टची टीम घडणुके सुवातेर पावली.
जखमींक बेगोबेग ऍम्बुलन्सीचे मजतीन राजावाडी आनी एम.टी. अग्रवाल हॉस्पिटलांत दाखल केलें, जंय ४ जाणांच्या मरणाची पुश्टी जाली. मरण आयिल्ल्यांचो आंकडो वाडपाची शक्यता आसा. बसीन एका लायटीच्या खांब्याकूय धपको दिल्ल्यान तो कोसळ्ळो. हाका लागून सगल्याक बोवाळ निर्माण जालो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
