भांगरभूंय | प्रतिनिधी
शिक्षण खात्याचे सगल्या शाळांक निर्देश
भांगरभूंय | प्रतिनिधी
पणजी : सुकूर पर्वरे एके सान पिरायेचे चलयेचेर जाल्ल्या लैंगीक अत्याचाराचे घडणुकेचे फाटभुंयेर शिक्षण खातें सादूर जालां. बालरथ तशेंच शाळेच्या भुरग्यांक व्हरपी हेर खाजगी गाडयांच्या ड्रायव्हरांची सक्तीन पुलीस तपासणी करपाचे निर्देश शिक्षण संचालनालयान सगळ्या शाळांक दिल्यात.
सुकूर पर्वरे एके 6 वर्सा पिरायेचे चलयेचेर स्कुलाच्या व्हॅन चालका कडल्यान लैंगीक अत्याचार जाल्ल्याची धपको दिवपी गजाल उक्ताडार आयिल्ली. देखून अशे तरेच्यो घडणुको फुडाराक जावच्यो न्हय हे खातीर शिक्षण खात्यान पयलींच जतनाय घेवपा खातीर पावलां उबारल्यांत.
भुरग्यांचे सुरक्षे विशीं भुरगीं हक्क राखण राष्ट्रीय आयोगान घालून दिल्लीं मार्गदर्शक तत्वां आनी भुरगीं सुरक्षा नेमां प्रमाण शाळेच्या भुरग्यांक हाडपी- व्हरपी बालरथ तशेंच हेर गाडयांचे ड्रायव्हर आनी हॅल्परांची पुलीस तपासणी करची, अशे निर्देश शिक्षण संचालक शैलेश झिंगडे हांणी सरकारी, अनुदानीत आनी बिगर अनुदानीत शाळेच्या सगल्या मुखेल्यांक दिल्यात.
बालरथ बस, स्कूल बस, व्हॅन आनी भुरग्यांची येरादारी करपी हेर गाडयांचे चालक आनी हॅल्परांची सक्तीन पुलीस तपासणी करची. जे मेरेन तांचें पात्र आनी समाधानकारक पुलीस तपासणी प्रमाणपत्र हातांत येना ते मेरेन खंयच्याच चालक वा हॅल्पराक भुरग्यांची येरादारी करपाक दिवचें न्हय.
पुलीस पडटाळणी प्रमाणपत्राचें वेळावेळार नुतनीकरण करचें, तशेंच जेन्ना नवो चालक वा हॅल्पर ना जाल्यार तांची बदली करता जाल्यार तांचे कडल्यान नव्यान पडटाळणी करून घेवची. सगल्या ड्रायव्हर आनी हॅल्परांची पुलीस तपासणी तपशील शाळेच्या वेवस्थापनांनी एका रजिस्टरांत नोंद करून दिवचे आनी अधिकृत मनशान जर हे तपशील पळोवणे वेळार मागल्यार तांचे मुखार सादर करचे.
ह्यो सुचोवण्यो खरपणान पाळपाची जापसालदारकी शाळेच्या मुखेलींची आनी संबंदीत शाळेच्या वेवस्थापनाची आसतली. ह्या परिपत्रकाक पाळो दिवप सक्तीचें आसा आनी जर हाका पाळो दिवंक ना जाल्यार ताची गंभीर दखल घेतले, अशी शिटकावणी परिपत्रकांत दिल्या.
लैंगीक अत्याचार : दुबाविताचो रिमांड 1 जानेवारी मेरेन वाडयलो
पणजी : पर्वरे 6 वर्सां पिरायेचे चलयेर लैंगाक अत्याचार केल्ल्या प्रकरणांत अटक केल्या दुबाविताचो पुलीस रिमांड 1 जानेवारी मेरेन वाडयला. पणजेच्या बाल न्यायालयान ताचो रिमांड वाडयला.
सुकूर – पर्वरी रावपी 46 वर्सां पिरायेच्या अल्लाबक्ष सय्यदाबादे हाचे आड पर्वरी पुलिसांनी गुन्यांव नोंद केला. खाजगी मोटारींतल्यान भुरग्यांची शाळेंत येरादारी करतना ताणें 6 वर्सांचे चलयेचेर लैंगीक अत्याचार केल्याची कागाळ नोंद जाल्या. हाचे उपरांत ताका अटक जाली. ताका पयलीं सात दिसांचो रिमांड दिल्लो. तशेंच ताची गाडी लेगीत पुलिसांनी जप्त केल्या. आतां परतून ताचो रिमांड 1 जानेवारी मेरेन वाडयला. हो गंभीर गुन्यांव आशिल्ल्यान तपासा खातीर पुलिसांनी दुबाविताचो रिमांड वाडोवन मागिल्लो. पर्वरी स वर्सां पिरायेचे चलयेचेर लैंगीक अत्याचार प्रकरणांतल्या दुबाविताच्या कुटुंबाक घर रितें करपा संबंदांत पंचायतीन नोटीस धाडिल्ली. हे नोटिशीची दखल मानवाधिकार आयोगान घेतल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
