भांगरभूंय | प्रतिनिधी
बर्च बनावट भलायकी एनओसी प्रकरण: लुथरा भावांक धाडले न्यायालयीन बंदखणींत
म्हापशें : बर्च बाय रोमिओ लेन क्लबा खातीर अकबारी खात्याचो (उत्पादन शुल्क) परवानो मेळोवपा खातीर कांदोळे भलायकी केंद्राचें बनावट नाहरकत प्रमाणपत्र (एनओसी) वापरिल्ल्या प्रकरणांत दुबावीत आरोपी रोमिओ लेनचे सह धनी अजय गुप्ता हाका म्हापशें न्यायालयान अतिरीक्त पांच दिसांची पुलीस बंदखण आयकयल्या. जाल्यार सौरभ लुथरा आनी गौरव लुथरा हांच्या ह्या याप्रकरणांतल्या अटकपुर्व जामीन अर्जाचेर फाल्यां ३० डिसेंबराक न्यायालयांत सुनावणी जातली.
ह्या बनावट एनओसी प्रकरणांत म्हापशें पुलिसांनी दुबावीत आरोपी अजय गुप्ता हाका फाटल्या २३ डिसेंबराक अटक केल्ली. तेन्ना म्हापशें प्रथमश्रेणी न्यायालयान ताका पांच दीस पुलीस बंदखणींत दवरपाचो आदेश दिल्लो. ही बंदखण सोंपत आयिल्ल्यान पुलिसांनी सोमारा २९ तारखेर सकाळीं दुबाविताक न्यायालयांत हाजीर केलो तेन्ना तांची पुलीस बंदखण पांच दिसांनी वाडयिल्ल्याचो आदेश न्यायालयान दिला.
मजगतीं, कांदोळे मुळाव्या भलायकी केंद्राचे अधिकारी डॉ. रोशन नाझारेथ हांणी ह्या एनओसी बनावटगिरी प्रकरणांत फाटल्या १७ डिसेंबराक पुलिशेंत कागाळ दाखल केल्ली. हो फटवणुकेचो आनी बनावटगिरीचो प्रकार १३ डिसेंबरा पयलीं अकबारी खात्याच्या म्हापशें निरीक्षक कार्यालयांत घडिल्लो. जाल्यार बर्च घडणुकेच्या चवकशे वेळार दुबाविताचो हो बनावटीचो प्रकार उक्तडार आयिल्लो.
साकवाडी हडफडेंच्या सर्वे नंबर१५९/० तल्या घर नंबर ५०२/१त चलोवपी जीएस हॉस्पिलिटी एलएलपी कंपनीच्या आस्थापना खातीर उत्पादन शुल्क परवानो मेळोवपाच्या हेतान दुबावीत आरोपींनी समान हेतान मुद्दम जावन आनी अप्रमाणिकपणान कांदोळी मुळाव्या भलायकी केंद्राचें नाहरकत प्रमाणपत्र (एनओसी) तयार केलें. जातूंत दुबावितांनी कागाळदारांची नक्कल करून सय बनावट केली आनी रजिस्टरांतले बनावट नोंदीचो वापर केलो.
उपरांत हो बनावट दाखलो खरो आशिल्ल्याचें भासोवन तो उत्पादन शुल्क खात्याकडेन सादर केलो. जाका लागून उत्पादन शुल्क परवान्या खातीर कागदोपत्रांचो वेव्हार पुराय करपाक मेळटलो आनी दुबावीत आरोपी उत्पादन शुल्क परवानो मेळोवपाक येसस्वी जाले. अशे तरेन तांणी कागाळदार तशेंच अकबारी अधिकार्यांक फटयले.
ह्या प्रकरणांत पुलिसांनी कंपनी सयत कंपनीचे अधिकृत धनी आशिल्ले सौरभ लुथरा, गौरव लुथरा आनी अजय गुप्ता हांचे आड भारतीय न्याय संहितेच्या ३३६(२), ३३६(३), ३३८, ३४०(२), ३१८(४) आनी ३(५) कलमा खाला गुन्यांव नोंद केला. फुडलो तपास पुलीस निरीक्षक नवीन देसाय हांंच्या मार्गदर्शनाखाला उपनिरीक्षक यशवंत मांद्रेंकार करतात.
मजगतीं, बर्च बाय रोमियो लेन क्लब अग्नितांडव प्रकरणांत अटक केल्ले दुबावीत सौरभ लुथरा आनी गौरव लुथरा हांकां १२ दीस न्यायालयीन बंदखणींत दवरपाचो आदेश म्हापशें न्यायालयान दिला. उपरांत हणजूण पुलिसांनी दुबावितांक न्यायालयीन बंदखणी खातीर कोलवाळे बंदखणींत धाडले. दुबावीत लुथरा भाव फाटल्या १७ डिसेंबर सावन पुलीस बंदखणींत आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
