भांगरभूंय | प्रतिनिधी
पणजीः सुकूर पर्वरे एक सान पिरायेच्या चलयेचेर जाल्ल्या लैंगीक अत्याचार्याचे घडणुकेचे फाटभूंयेर शिक्षण खातें सादूर जालां. बालरथ तशेंच शाळेच्या भुरग्यांक व्हरपी हेर खाजगी वाहनांच्या ड्रायव्हरांची सक्तीन पुलीस तपासणी करपाचे निर्देश शिक्षण संचालनालयान सगळ्या शाळांक दिल्यात.
सुकूर पर्वरे एक ६ वर्सा पिरायेच्या चलयेचेर स्कुलाच्यो व्हॅन चालका कडल्यान लैगींक अत्याचार जाल्ल्याची धक्को दिवपी गजाल उक्ताडार आयिल्ली. देखून अशे तरेच्यो घडणुको फुडाराक जावच्यो न्हय हे खातीर शिक्षण खात्यान पयलींच जतनाय घेवपा खातीर पावलां उबारल्यांत.
भुरग्यांचे सुरक्षा विशीं भुरगीं हक्क राखण राष्ट्रीय आयोगान घालून दिल्लीं मार्गदर्शक तत्वां आनी भुरगीं सुरक्षा नेमां प्रमाण शाळेच्या भुरग्यांचे यो-वच करपी बालरथ तशेंच हेर वाहनांचे ड्रायव्हर आनी हॅल्परांची पुलीस तपासणी करची अशे निर्देश शिक्षण संचालक शैलेश झिंगडे हांणी सरकारी, अनुदानीत आनी बिगर अनुदानीत शाळेच्या सगल्या मुखेल्यांक दिल्यात.
बालरथ बस, स्कुल बस, व्हॅन आनी भुरग्यांची येरादारी करपी हेर वाहनांचे चालक आनी हॅल्परांचे सक्तीन पुलीस तपासणी करची. जो मेरेन तांचें पात्र आनी समाधानकारक पुलीस तपासणी प्रमाणपत्र हातांत येना तो मेरेन खंयच्याच चालक वा हॅल्पराक भुरग्यांची येरादारी करपाक दिवचें न्हय.
पुलीस पडटाळणी प्रमाणपत्राचें वेळावेळार नुतनीकरण करचें, तशेंच जेन्ना नवो चालक वा हॅल्पर ना जाल्यार तांची बदली करता जाल्यार तांचे कडल्यान नव्यान पडटाळणी करून घेवची. सगळ्या ड्रायव्हर आनी हॅल्परांची पुलीस तपासणी तपशील शाळेच्या वेवस्थापनांनी एका रेजिस्टरांत नोंद करून दिवचे आनी अधिकृत मनशान जर हे तपशील पळोवणे वेळार मागल्यार तांचे मुखार सादर करचे.
ह्यो सुचवण्यो खरपणान पाळपाची जापसालदारकी शाळेच्या मुखेलींची आनी संबंदीत शाळेच्या वेवस्थापनाची आसतली. ह्या परिपत्रकाक पाळो दिवप सक्तीचें आसा आनी जर हाका पाळो दिवंक ना जाल्यार ताची गंभीर दखल घेतले, अशी शिटकावणी परिपत्रकांत दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
