भांगरभूंय | प्रतिनिधी
बर्च उज्या प्रकरणाची हणजूण पुलीसां वतीन चवकशी
पणजी : बर्च क्लबाविशीं जे कितें गैरवेव्हार जाल्यात तांची म्हायती हांवें संबंदीतांक दिल्ली. खात्यांनी पयलींच चवकशी करून कारवाय केल्ली जाल्यार ही घडणूक जावची नासली, अशें प्रदीप घाडी आमोणकार हांणी सांगलें. हणजूण पुलिसां वतीन बर्च प्रकरणांत चवकशी जाले उपरांत तांणी हें वक्तव्य केलें.
बर्च बाय रोमिओ क्लब मालमत्ते प्रकरणांत प्रदीप घाडी आमोणकार हे एक वांटेकार आशिल्ले. हेच फाटभूंयेर हणजूण पुलिसांनी सोमारा तांची चवकशी केली. म्हजे कडेन बर्च क्लबाविशीं आशिल्ली सगली म्हायती हांवें पुलिसांक दिल्या. १९९४ उपरांत १० वर्सां मेरेन हांव बर्चचो धनी आशिल्लों. हांवें हॉटेल चलयलें. गैरवेव्हारांची म्हायती मेळ्ळे उपरांत सुरींदर कुमार खोसला हांचे कडली कबलात हांवें रद्द केली. हाचे उपरांत बर्च क्लबाकडेन म्हजो संबंद येवंक ना. खात्यां कडेन हांवें पत्र वेव्हार लेगीत केला. ही सगली म्हायती हांवें चवकशी करपी पुलिसांक दिल्या, अशें आमोणकार हांणी सांगलें.
जिल्लोधिकारी अंकीत यादव हांच्या फुडारपणा खाला चवकशी समितीन लेगीत घाडी आमोणकार हांची जबानी नोंद केल्ली. जिल्लोधिकारी अंकीत यादव हांचे समितीन सरकाराक अहवाल सादर केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
