भांगरभूंय | प्रतिनिधी
पणजी : सांखळेच्या कृष्णा पॅट्रोल पंपाचेर चोरी करपी एके गुन्यांवकारी टोळयेक दिवचल पुलिसांनी उक्तडार हाडली. ह्या प्रकरणांत पुलिसांनी दोगां तरणाट्यांक अटक केली. तशेंच एक नेण्ट्या भुरग्याक ताब्यांत घेतलो. हे दुबावीत गोंय आनी महाराष्ट्र राज्यांत सक्रीय आशिल्ले एके व्हड गुन्यांवकारी टोळयेचे वांगडी आशिल्ल्याचें तपासांत उक्तें जाल्ल्यान तांचेर भारतीय न्याय संहितेच्या संघटीत गुन्यांवकारी कलमां खाला कारवाय केल्या.
हे विशीं मेळिल्ले म्हायती प्रमाण, आयतारा २८ डिसेंबराक सकाळीं सुमार ५:५० वरांचेर अनवळखी चोरांनी कारापूर-तिस्क हांगच्या सुनील पर्वतकार हांच्या पेट्रोल पंपाच्या कार्यालयांत प्रवेश करून ९ हजार रुपया आनी सीसीटीव्ही फुटेज आशिल्लो डीव्हीआर चोरून व्हेल्लो. हे कागाळी उपरांत दिवचल पुलिसांनी रोखडीच तपासाक सुरवात केली. रातच्या वेळार गस्त घालतना उपनिरीक्षक रश्मीर परब मातोंडकार हांणी दुबावीत तरेन भोंवपी तिगां तरणाट्यांक ताब्यांत घेतले. तांची खोलायेन चवकशी केली तेन्ना तांणी पेट्रोल पंपावेले चोरये विशीं सांगलें.
अटक केल्ल्या दुबावितांचीं नांवां महेश शिव शेट्टी (१९, रा. करई) आनी भुवन टिळकराज पिल्लई (१८, रा. पेडें-म्हापशें) अशीं आसात. जाल्यार एका नेण्ट्या भुरग्याक मेरशेच्या ‘अपना घर’त धाडलो. पुलिसांनी तांचे कडल्यान चोरी केल्ल्याच्या दुबा वेल्यान एक होंडा डिओ दुचाकीय जप्त केली.
तपासा मजगतीं, हे दुबावीत म्हापशें, कोलवाळे आनी हेर भागांत दुकान फोडी आनी दुचाकी चोरयेच्या गुन्यांवांत घुस्पल्ले आसात म्हूण. तशेंच महाराष्ट्रांतल्या बांदा आनी कुडाळ भागांतूय ह्या चोरांनी जायते गुन्यांव केल्यात. हे सगले नेण्टे आसतना सावन गुन्यांवकारी मळार वावुरतात, अशेंय पुलिसांनी उक्तें केलें.
ह्या आरोपींचें संघटीत गुन्यांवकारीचें स्वरूप लक्षांत घेतल्यार, तांचेर बीएनएस २०२३ च्या कलम ११२ खाला गुन्यांव दाखल केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
