भांगरभूंय | प्रतिनिधी
प्रिलिम्स जाल्यो, आतां निमणे परिक्षेचे तयारेक तुमी लागल्या आसतले. येन्ना मेरेन सगल्या शाळांतलो अभ्यासक्रम शिकोवन सोंपला आसतलो. दुसरी उजळणी सुरू जातली. सगल्यांची अपेक्षा आसा की तुमी फक्त पास जावचे नात, तर चड गूण घेतले. कारण आयज काल मेळटा तितले गूण उणेच, इतली सर्त वाडल्या. नव्या युगा वांगडा अभ्यासाच्यो नव्यो पद्दती आयल्यात, तितलींच आडमेळींय वाडल्यांत, हें खरें. आदल्या तेंपार चडशे भुरगे अभ्यास करपाक दोंगरांनी, शांत देवळांनी वताले. कारण घरांत अभ्यास जायनासतलो. आवाजाचें प्रदूशण करप्यांनी हें मतींत घेवपाक जाय. त्या काळांत खंय सुवात कमी, खंय लोकांची, घरच्यांची गडबड अशीं कारणां आसतालीं, पूण आतां सुवातेची अडचण ना. लोकूय येवपाची शक्यताय ना. कारण आतां सगलेच मोबायल फोनाक दसून आसतात. कोण कोणागेर वचनात, येनात.
तर प्रस्न आसा तो धावेचे निमणे परिक्षेचो. आतां तर सोशल मिडिया वरवीं थोडे आॅनलायन सेवाय दितात. आदल्या तेंपार आमकां सांगताले, तुमी अभ्यास फांतोडेर केल्यार बरो. तशी अजूनय होच वेळ बरो आसा. पूण थोड्यांक हो वेळ आवडना, तांकां उठपाक आळस येता. तांकां रातचो वेळ आवडटा. खंयचोय वेळ बरो. पूण मन लावन अभ्यास केल्यार. गोंय शालांत मंडळान तर परिक्षेची तारीखूय जाहीर केल्या. अजून तीन म्हयने उरल्यात.
अभ्यासाचो एक आराखडो, नियोजन तयार करात. तो कसो करपाचो तें थारायात. खंयच्या विशयाक कितलो वेळ दिवपाचो, तें नक्की करात. तुमी मार्गदर्शना खातीर शिक्षकांची मजत घेवपाक शकतात. पालक उच्च शिक्षीत, वेळ दिवपी आसल्यार तांची मजत घेयात. कितलींशीं नवीं तंत्रज्ञानां आयल्यांत, पूण प्रत्यक्ष मनशाची सुवात तीं घेवपाक शकनात. तुमी खंयचो फांटो घेतले तें परिक्षेंत मेळिल्ल्या गुणांचेर थारता. तुमकां आवड आसा आनी गूण कमी पडल्यार त्या फांट्याक वचपाक मेळना. खरें म्हणल्यार आठवे पसूनच पद्दतशीर अभ्यास करपाची तयारी करपाक जाय. धावेक अभ्यासाची पद्दत थारावपाक जाय, कारण तुमकां अजून दोन वर्सां काडपाचीं आसतात. हातूंत तुमी विज्ञान, काॅर्मस, कला, व्होकेशनल फांटे घेवपाक शकतात. पूण तुमचे भितर एक तरी कुशळटाय जर आसली जाल्यार तुमी आयटीआय केंद्रांत प्रवेश घेवं शकतात.
शाळेंत आसतना तुमकां पर्यटन, आॅटोमोबायल सारके विशय आसताले. ते याद करून तें शिकप चालू दवरूं शकतात. खाशेली गजाल म्हणल्यार गोंयांत प्रत्येक तालुक्यांत आयटीआय केंद्र आसा. ताचे भायर तें शिक्षण दिवपी खाजगी संस्थाय आसात. प्रत्येक संस्थांची वेबसायट आसा. ती तुमी पळोवपाक जाय. प्रत्यक्ष ते संस्थेक भेट दिवन तांचे कडलें ब्रोशर बी वाचपाक जाय. तुमच्या पालकांक हाची कल्पना दिवंक जाय. हें तुमी परिक्षा जाले उपरांत वा निकाल लागचे पयलीं करपाक शकतात. आतांच ताकतीक नाका. तुमकां मना पसून कितें आवडटा, ते मेकळेपणान पालकांक सांगात. इश्ट चलतो म्हूण तुमीय ताचे फाटल्यान धांवूं नाकात. जो निर्णय घेतात, ताच्या परिणामांचीय जापसालदारकी तुमकां घेवची पडटली. तुमकां करीयर करपाचें आसा. तेन्ना कामाक, समाधानाक प्राधान्य दियात. पगार, भत्ते कितले मेळटले, ताचो चड विचार करूं नाकात.
तुमी विज्ञान फांटो घेवन मुखार दोतोरकेक गेले जाल्यार संशोधन करपाचो विचार करात. स्पेशलायझेशनाचो विचार करात. समाजसेवेचोय विचार मनांत आसुंदी. आमच्या देशांत कितल्योश्योच समस्या आसात. ताचेर तुमी उपाय काडपाक शकतात. विज्ञान फांट्यांत वचपी चडशे विद्यार्थी दोतोर वा इंजिनियर जावपाक वतात. पूण अशीं कितलींशीच दुयेंसां आसात, जाचेर रामबाण उपाय मेळूंक नात. कोरोना चीनान पातळायलो अशें लोक म्हणटात. खरें फट कोण जाणा, पूण हे चीनी लोक संशोधनाचेर बारीकसाणेन भर दितात. गोडेंमुताचें दुयेंस सगल्या घरांनी पातळ्ळां. हो संशोधनाचो विशय. पार्किन्सन दुयेंसूय आसा. पुण्यां म्हजो इश्ट रावता. डाॅ. बर्डे. ताणें ह्या दुयेंसाची भरपूर म्हायती मेळयल्या. ते सांगतात, तुमच्या पांयांची, हाताचीं बोटां थरथरतात जाल्यार दोतोराक दाखयात. ह्या विशयाचेर पसून तरणाट्यांक दोतोर जावन खूब संशोधन करूं येता. दोतोरांची मजत ह्या दुयेंसाक जायच, पूण संशोधन करपाचीय तयारी जाय. सगलेच जाण पयशांचें तोंड पळोवपाक लागले जाल्यार कशें जातलें?
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
