पयले तिमाहींत ठेवी आनी रीण दिवपाक बँक ऑफ महाराष्ट्र आघाडेर

भांगरभूंय | प्रतिनिधी

भांगरभूंय । पत्रक
पणजीः2022-23चे पयल्या तीन म्हयन्यांत ठेवी एकठांय करपाक तशेंच रीण वितरण करपाक भौशीक मळावयल्या बँक ऑफ महाराष्ट्रांन पयली सुवात मेळयल्या. ह्या तिमाहींत बँकेन 1,40,561 कोटींचो वेव्हार करून तातूंत 27.10 टक्क्यांची वाड केल्या.
बँक ऑफ महाराष्ट्र उपरांत इंडियन ओव्हरसीस बँक आनी बँक ऑफ बडोदान दरेकी 16.43 आनी 15.73 टक्के वाड करून नंबर मेळयल्यात. देशाची आघाडेच्या स्टेट बँक ऑफ इंडियान 13.66 टक्के वाड करून चवथी सुवात मेळयल्या. स्टेट बँकेन 24,50,821 कोटी, बँक ऑफ बडोदान 6,95,493 कोटी रुपयांचो वट्ट वेव्हार केला.
अंदूच्या जून मेरेन बँक ऑफ महाराष्ट्रान ठेवींत 12.35 टक्क्यांची वाड केल्या. तांणी 1,95,909 कोटी रुपयांच्यो ठेवी जमा केल्यात. युनियन बँकेन 9.42 टक्क्यांनी वाड करून 9,92517 कोटी रुपया जमा केल्यात. ते उपरांत बँक ऑप बडोदा (9,09,095 कोटी). पयल्या तिमाहींत भौशीक मळा वयल्या बँकांक रीण घेवपाचें प्रमाण कमी जावंन लेगीत फायदो जाला अशें दिसून आयलां. भौशीक मळा वयल्या 12 बँकांक मेळून सुमार 15.306 कोटीचो फायदो पयल्या तिमाहींत जाला. ही वाड 9.2 टक्के आसा. स्टेट बँक आन पंजाब नॅशनल बँकेक तुळेन कमी फायदो जाला. पोरूंच्या अर्थीक वर्साचे तिमाहींत बँकांक वट्ट 14,013 कोटींचो फायदो जाल्लो. बँक ऑफ महाराष्ट्र आनी स्टेट बँकचो एनपीए दरेकी 3.74 आनी 3.91 टक्के आसा.