भांगरभूंय | प्रतिनिधी
गोंयांत जिल्हो पंचायत वेंचणुको बरे तरेन जाल्यो. ना गोंदळ, ना गडबड. मतदान शांततायेंत जालें. दादले, बायलांनी व्हड प्रमाणांत मतदान केलें. बायलां मतदार दादल्यां परस चड आसल्यो. दरेका गांवांत एक तरी बायल जैतिवंत जाल्या. खरें म्हणल्यार प्रत्येक पक्षाच्या प्रचारांत दारादारांत वचून, रातदीस कश्ट घेवन प्रचार केला. मतदारांची गांठभेट घेतल्या. आतां प्रत्येक उमेदवाराची जापसालदारकी वाडल्या. एकदाचें वेंचून आयलें आतां आमचें काम सोंपलें, भाई सांगता तितले आयकूपाचें अशें ना समजप बरें. समाजांतल्या गोरगरिबांक दिल्लीं आस्वासनां पुराय करपाचे तयारेक तांणी लागप बरें. तें तांचें कर्तव्य. प्रत्येक नागरीक दोळ्यांत तेल घालून पळयत आसा.
आपूण रावता त्या गांवाचो सर्वांगी विकास, गांवचे फोंडकुलां पडिल्ले रस्ते, आपालिपा खेळपी लायट, दर दोन दिसांनी वचपी उदक ह्या समस्यां कडेन पळोवपाक जाय. रस्त्यांचेर गोरवां, सुणीं भोंवतात, गाडयो चलोवप्यां फाटल्यान धांवतात, तांचोय बंदोबस्त करपाक जाय. ह्यो सगल्यो समस्या पंचायतींत, आमदार, मंत्र्यां कडेन, संबंदीत खात्यां कडेन वचून मांडप हें जिल्हो पंचायत वांगड्याचें मुख्य काम. स्ट्रीट लायटी रातच्यो पेटनात, सीसीटीव्ही कॅमेरे चलनात, ताचे कडेनूय लक्ष दिवंक जाय रस्त्यार प्लास्टिकाच्यो पोतयो उडोवपी लोक आसतात. तांकां धरपाक जाय. पंचांनीय हें काम करचें.
गांवांतली गटारां नितळ आसतलीं, सरकारी येवजण्यो सगल्यांक मेळटल्यो हें पळोवपाचें कामूय जिल्हो पंचायत वांगड्यांनी करचें. ह्या येवजण्यांचें अर्जूय तांणी भरून दिवपाक जाय. लोकांचीं अडिल्लीं कामां केल्यारुच खूब जालें.
राजकारणांत बायलां वेंचून येवप म्हणल्यार दुदांत साकर. त्यो केन्नाच भ्रश्टाचार करच्यो नात. तांकां दुसऱ्या बायलांचें दुख्ख कळटा. तांची तळमळ, कळकळ समजूंक शकतात तीं. बायलां उमेदवारांनी बायलांच्यो समस्यो सोडोवच्यो. बायलांच बायलांचो फुडार उज्वल करपाक शकतात. वेंचून आयिल्ल्या दरेका उमेदवारान प्रामाणिकपणान काम केल्यार गांवाचो सर्वांगी विकास जावपाक चड वेल लागचो ना.
-सिद्धी तिळवे
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
