भांगरभूंय | प्रतिनिधी
दामू नायक : अटल स्मृती संमेलनांत मार्गदर्शन
भांगरभूंय । प्रतिनिधी
दिवचल : भारतीय संस्कृतींत खूबश्यो परंपरा आसात, तशीच म्हान व्यक्तींची परंपरा आसा. आदले प्रधानमंत्री अटलबिहारी वाजपेयी हांची देशाचे वाटचालींत म्हान फुडारी, राष्ट्रभक्त म्हूण मेजणी जाता. तांचो वावर म्हान आसा. तांचो आदर्श दरेक भाजप कार्यकर्त्या खातीर व्हड देणें आसा. तांचो आदर्श दरेकल्यान बाळगुचो. उत्कृश्ठ साहित्यीक, वक्तो, कवी, उत्कृश्ठ प्रधानमंत्री, लोकप्रीय फुडारी अश्या साबार मळार तांचें व्हड योगदान आसा, अशें भाजप अध्यक्ष दामू नायक हांणी सांगलें.
मुळगांव दिवचले अटल स्मृती संमेलन कार्यावळींत दामू नायक भाजप कार्यकर्त्यांक मार्गदर्शन करताले.
अटलबिहारी वाजपेयी हांणी दिल्लें योगदान, तांची निती, धाडस, संयम हाचे विशीं खोलायेन मार्गदर्शन करतना एके तरेन वाजपेयी हांचे जिणेचेर सुंदर शैलींत व्याख्यान दिलें.
नवे पिळगेक अटलबिहारी वाजपेयी हांचो वावर कळपाक जाय. वायट परिस्थितींत कशे तरेन भाजपची वाटचाल जाली हाचो इतिहास कळपाक जाय. 2 खासदार ते 15 कोटी वांगडी, देड हजार आमदार असो भाजपाचो व्हड प्रवास आसा. खर उलोवपी, राष्ट्रवादी गुणांनी भरिल्ले, भारतरत्न अटलबिहारी वाजपेयी हे देशा खातीर जल्माक आयले आनी देशा खातीर प्राण दिलो. तांचें जिवीत प्रेरणा दिवपी आसा. तांणी नैतीक मुल्यां आनी देश प्रथम ही भावना देशांत आनी भाजप कार्यकर्त्यां मदीं रुजयलीं, अशें गोरख मांद्रेंकार हांणी मुखेल उलोवपी म्हूण उलयतना सांगलें.
ह्या वेळार माचयेर दामू नायक, गोरख मांद्रेंकार हांचे वांगडा आमदार डॉ. चंद्रकांत शेट्ये, आमदार प्रेमेंद्र शेट, पद्माकर मळीक, महेश सावंत, कुंदा मांद्रेंकार, दयानंद कारबोटकार, विजयकुमार नाटेकार, डॉ. कोस्तुभ पाटणेकार हाजीर आशिल्ले.
डॉ, कौस्तुभ पाटणेकार हांणी येवकाराच्या उलोवपांत अटलबिहारी वाजपेयी हांच्या वावराची म्हायती दिली.
आमदार डॉ. शेट्ये हांणी सांगले, वाजपेयी हे अजात शत्रू कवी मनाचे आशिल्ले. तांणी देशाच्या राजकारणांत समाजकारण करतना सामक्या प्रामाणीकपणान कार्यकर्त्यांची फळी देशांत निर्माण केली. तीन खेपे प्रधानमंत्री जाले. तांचो वावर असामान्य आशिल्लो. तांचो आदर्श आयच्या युवा आनी राजकी फुडाऱ्यांनी घेवन वाटचाल करची, अशें तांणी सांगलें.
आमदार शेट हांणी सांगलें, वाजपेयी हांणी भाजपाक व्हड शक्त दिली. देशाक नवी उर्जा दिवपांत वाजपेयी हांचें व्हड योगदान आसा. ह्या वेळार वाजपेयी हांच्या कार्यकाळांतले कार्यकर्ते वल्लभ साळकार हांचे सत्कार केलो. तशेंच जिल्हो पंचायत वांगडी पद्माकर मळीक, महेश सावंत, कुंदा मांद्रेंकार हांचोय भोवमान केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
