भांगरभूंय | प्रतिनिधी
तिरुवनंतपुरम : केरळांतलें नामनेचें तीर्थक्षेत्र आशिल्ल्या सबरीमला अय्यप्पा देवळांत अंदुच्या मंडल पुजा हंगामांत विक्रमी भावीक हाजीर रावले आनी येणावळ मेळ्ळी. वट्ट ३०.५६ लाखां परस चड भाविकांनी दर्शन घेतिल्ल्यान देवळाचे तिजोरेंत आतां मेरेन ३३२ कोटी ७७ लाख रुपयांचे उत्पन्न जमा जालां, अशी म्हायती त्रावणकोर देवस्वोम बोर्डाचे अध्यक्ष के. जयकुमार हांणी दिली.
४१ दीस चलपी पयल्या टप्प्यांतले यात्रेचो कळस म्हळ्यार मंडल पुजा, जी शेनवारा भक्तीभावान जाली. ह्या वेळार भगवान अय्यप्पांचे मुर्तीचेर ‘थंका अंकी’ (भांगरा वस्ती) घाल्ल्यो. ह्यो भांगरा वस्ती शुक्रारा सांजेवेळार परंपरीक मिरवणुकींतून सन्निधानम हांगा हाडल्यो.
येणावळीचें मुखेल स्रोत
त्रावणकोर देवस्वोम बोर्डाच्या अधिकृत आकडेवारी प्रमाण, अंदूची येणावळ फुडल्या घटकांतल्यान मेळ्ळा.
कणिक्का (हुंडी दान), अप्पम आनी अरवणा प्रसाद विक्री, कुडीचें भाडें, पावणी आनी हेर सेवा शुल्क.
हातुंतल्या कणिक्कांतल्यान ८३.१७ कोटी रुपया मेळ्ळे. जे फाटल्या वर्साचे तुळेंत वाडल्यात.
पोरूं परस अंदूं चड
फाटल्या वर्सा मंडळ काळ सोंप मेरेन ३२.४९ लाख भक्तांनी ह्या देवळाक भेट दिली. ४१ दिसांत २९७.०६ कोटी रुपया नोंद जाल्ले. अंदूं मात ४० दिसांनी ३३२.७७ कोटी रुपयांचेर येणावळ पावली. ३५.७० कोटी रुपयांनी वाड जाल्या.
फुडले मकरविलक्कू यात्रे मजगतीं भाविकांची संख्या आनीक वाडपाची शक्यताय आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
