भांगरभूंय | प्रतिनिधी
पणजी: तेरेखोल न्हंयेच्या पात्रांत बेकायदेशीर रेंव उसपप परत नेटान सुरू जाल्ल्यान न्हंये देगेर आशिल्ल्या गांवांनी खर तिडक उक्तायल्या. दोन म्हयन्यां आदीं उगव्यां जाल्ल्या फारपेट प्रकरणा फाटल्यान रेंव वेवसाया वेल्यानूच वाद आशिल्ल्याचो दुबाव उक्तायल्लो. हे फारपेटींत दोन कामगार गंभीर जखमी जाल्ले. ह्या प्रकरणांत थळाव्या नागरिकांक अटकूय जाल्ली, मात हालींच तांची सुटका जाले उपरांत परत एक फावट तेरेखोल न्हंयेत रेंव उसपप नेटान चालू जाल्ल्याचें चित्र दिसता.
न्हंयेच्या पात्रांत रातच्या काळखांत व्हडा प्रमाणांत व्हडीं देंवोवन रेंव उसपप चाल आसता, हो बेकायदेशीर वेवसाय नियोजनबद्ध पद्धतीन सुरू आशिल्ल्याचो आरोप थळाव्यांनी केला.
केरी व्हडा प्रमाणांत रेंव उसपप सुरू
केरी वाठारांत तेरेखोल न्हंयेंत व्हडा प्रमाणांत बेकायदेशीरपणान रेंव उसपप चालूच आशिल्ल्याचें स्पश्टपणान दिसता. विशेश म्हळ्यार, दर्यादेग पुलिसांनी चौकी फक्त एक किलोमीटर अंतराचेर आसा.
व्हड्या फाटल्यान हप्तो?
थळाव्या सु णांनी दिल्ले म्हायती प्रमाण, ह्या रेंव वेवसायांतल्या दरेका व्हड्या फाटल्यान म्हयन्याक सुमार ३५ हजार रुपयांची वसुली करतात. उपरांत हे लाखांनी रुपया एकठांय करून ताचे वांटे घालतात आनी ते संबंदीतांक पावयतात, अशी म्हायती सुत्रां कडल्यान मेळ्ळी. इतलेंच न्हय, जाल्यार कांय कर्मचारी, अधिकारी ह्या वेवसाययिकांचेर सेगीत पयशां खातीर चेंपण हाडटात अशी उक्ती चर्चा लोकां मदीं चालू आसा.
शेतांचो इबाड
रेंव उसपिल्ल्यान तेरेखोल न्हंये देगेवेल्या पुराय भागाक धोको निर्माण जाला. खुबशे सुवातेवेल्यो न्हंयेचो देगो मुंगरिल्ल्यान फुडाराक व्हड दुर्घटना जावपाची भिरांत न्हयकारपाक येना. बागायती, मळे, शेतां आनी शेत जमनींचें व्हडा प्रमाणांत लुकसाण जाल्ल्यान शेतकरी अर्थीक संकश्टांत सांपडल्यात. मुख्यमंत्री आनी थळाव्या आमदारान हातूंत लक्ष घालचें, अशी मागणी जाता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
