भांगरभूंय | प्रतिनिधी
पणजी ः गोंय पुलिसांच्या गुन्यांव फांट्याची एकूच पोरणी बोलेरो जीप मोडिल्ल्याक ती मोटर येरादारी विभाग (एमटी) गॅरेजींत पडून आसा. फांट्याक पुलीस खात्या कडल्यान दोन वाहनांची मंजुरी मेळ्ळ्या तरी एमटी विभाग ती पुराय करिनाशिल्ल्यान सध्या फांट्या कडेन वाहन ना.
गुन्यांव फांट्याची हद्द पुराय गोंयभर आसा. राज्यांत खंयसरूय छापो घालून अटक केल्ल्या गुन्यांवगारांक हांगच्या न्यायालयांत हाजीर करपाक वाहनाची गरज आसता. मात गुन्यांव फांट्या कडेन एकूच बोलेरो जीप आसा. हे जिपींतल्यान दुबावितांक न्यायालयांत तशेंच वैजकी उपचारा खातीर हॉस्पिटलांत व्हरचें पडटा.
हालींच कोलवाळेचे बंदखणींतल्या एका दुबाविताक पणजेच्या न्यायालयांत हाजीर करपा खातीर व्हरतना गुन्यांव फांट्याची जीप पेडें, म्हापर्श्यां मागारर बंद पडली. उपरांत एएनसीचे गाडयेंतल्यान दुबाविताक पुलिसांनी न्यायालयांत हाजीर केलो. जिपीच्या दावे वटेनच्या टायरा लागसारचो लोव्हर आर्म स्क्रू तुटिल्ल्यान ही गाडी मोडली. क्रेनीचे मजतीन हे गाडयेक सारकी करपा खातीर पुलीस मोटार ट्रान्सपोर्ट विभागांत दवरली.
ही एकूच आशिल्ली गाडी मोडिल्ल्यान दुबावितांक हाड-व्हर करपाक खंयचे गाडयेचो वापर करचो, असो प्रस्न गुन्यांव फांट्या मुखार येवन रावला.
१० वर्सां आदीं गुन्यांव फांट्याक ही जीप दिल्ली. ही जीप पोरणीं जाल्ल्यान तशेंच ती सेगीत मोडिल्ल्यान नव्या दोनवाहनांची वेवस्था करची, अशी लिखीत मागणी गुन्यांव फांट्यान केल्ली. हे विशींच्या दोनूय नोटीसींक पुलीस महानिरीक्षक तशेंच महासंचालकांनी मान्यताय दिल्ली. हे मंजुरीक वर्स जावन गेलें तरी मोटार येरादारी विभागान गुन्यांव फांट्याक नवें वाहन दिवंक ना. मंजुरी दिवन लेगीत वाहन कित्याक दिनात, हाचेय कारण एमटी विभाग दिना, असो प्रस्न पुलीस अधिकार्यांक पडला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
