भांगरभूंय | प्रतिनिधी
रांदचे कुडींतल्यान दर दिसा भायर सरपी सेंद्रिय कोयर हो घरगुती शेती खातीर खूब बरो. भाजयो, फळांच्यो साली, च्या पावडर, थोडी माती आनी ओलसाण हांच्या आदारान घरांतूच कंपोस्ट तयार करपाक येता.
घर आनी शेत – दोनूय पांवड्यार शेतीक नवो रूप दिवपाची आज खूब गरज आसा. आमच्या देशांतलीं जायते गांव अशे आसात, जंय शेती हो मुखेल वेवसाय आसलो तरी जमीन, उदक, संसाधनां हांची उणीव जाणवता. जाल्यार कांय कडेन जमीन-उदक खूब आसून लेगीत लोकांचो शेती कडेन कल उणो आसा. शेती शिक्षण घेतिल्ले तरणाटे नोकरे फाटल्यान धांवतना दिसतात, पूण तांणी केल्लो अभ्यास प्रत्यक्ष शेतींत देंवपाची तयारी उणी आसा. असल्या वेळार यशस्वी शेतकारांनी फुडें येवन शेतींतल्यो संदी, नवें तंत्रज्ञान आनी उद्योजकतेचो मार्ग सगळ्यांक दाखोवप गरजेचें आसा. कारण अन्न, वस्त्र, निवाडो ह्यो मनशाच्या जिवितांतल्यो मूलभूत गरजो शेतींतल्यानूच पुराय जातात, देखून शेतीक उर्बा दिवपांत कांयच वायट ना.
शेतकार मुळांतूच एक सक्षम उद्योजक आसता. हवामानाचो अदमास, कीड-रोग वळखप, फवारणी करप, जमिनीची मेजणी, उत्पादनाचें सांठवण, बाजारपेठेचें ज्ञान आनी धान्य विक्री – हीं सगळीं कौशल्यां ताचे कडेन आसतात. शेतीक जोडवेवसाय जोडून तो आपलें उत्पन्नस्त्रोत वेगवेगळें करता. पशुपालन, कुक्कुटपालन, मत्स्यपालन, मेंढीपालन, कृषिपर्यटन सारकिल्या संधींक लागून शेती हो फकत वेवसाय न्हय, तर उद्योगांत रुपांतरीत जावं येता. आजची तरणाटी पिळगी जर थोडो धीर करून मातींत देंवली, आधुनिक तंत्रज्ञान वापरून नावीन्यपूर्ण शेती केली, जाल्यार “शेती हो सगळ्यांत बरो वेवसाय आसा” हें प्रत्यक्ष सिद्ध जावं येता. ह्याच विचारा कडेन निगडीत घरगुती शेतीची संकल्पना म्हळ्यार होम गार्डनिंग आनी किचन गार्डन जावन आसा.
शारांतल्या वा गांवांतल्या ल्हान घरांनी लेगीत आंगण, गच्ची, बल्कांव वा जनेला लागीं जागो वापरून भाजीपालो, फुलां, कांय ल्हान फळझाडां सोंपेपणान लावपाक येतात. किचन गार्डनांतल्यान मेळपी भाज्यो आनी फळां सेंद्रीय पद्दतीन पिकोवपाक येतात; भाजीपालो पिकोवपाचीं मार्गदर्शक तत्त्वां रासायनिक साऱ्या बदला सैमीक सारें, सेंद्रिय किटनाशकां वापरून भलायकीदायक अन्नघटक मेळोपाक येतात. पालक, मेथी, कोथिंबीर, टोमॅटो, दुदी, कोबी, मिरसांग, कांय थळावीक फळां – हें सगळें थेट घरांतल्या मातयेच्या पोरसांतल्यान ताज्या स्वरूपांत ताटांत येवंक शकता. ताका लागून बाजाराचेर निंबून रावप उणें जाता, खर्च कमी जाता.
रांदचे कुडींतल्यान दर दिसा भायर सरपी सेंद्रिय कोयर हो घरगुती शेती खातीर खूब बरो. भाजयो, फळांच्यो साली, च्या पावडर, थोडी माती आनी ओलसाण हांच्या आदारान घरांतूच कंपोस्ट तयार करपाक येता. हें सेंद्रिय सारें खूब सुपीक आनी रसायनमुक्त आसता. आमच्या पोरसाची माती सुपीक जाता. अशे तरेन कोयराचो बरे तरेन वापर करूं येता.
होम गार्डनिंग, किचिन गार्डन, सेंद्रिय शेती आनी कचऱ्याचें कंपोस्टिंग ह्यो सगळ्यो गजाली मेळून पर्यावरणस्नेही जीवनपद्दती घडयतात. रसायनमुक्त अन्नाक लागून भलायकी बरी उरता, रोगप्रतिकारशक्ती वाडटा आनी भावी पिळग्यां खातीर निवळ हवा, निवळ माती, निवळ उदक जपपाचें कार्य आपोआप घडटा.
निमणे कडेन एकूच मुद्दो ठामपणान फुडें येता – मातयेक परत स्पर्श करात, तिका जपून दवरात; कारण शेतीच आमच्या पृथ्वीचें, आपल्या भलायकेचें आनी आपल्या भवितव्यांतलें खरें संरक्षण कवच आसा.
प्रमिला प्रसाद फळ देसाय
9011834847
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
